პოლიტიკა

არჩილ თალაკვაძე პროკურატურას ელისო კილაძის დაცვის პროგრამაში ჩართვას ურჩევს

უმრავლესობის წევრის, არჩილ თალაკვაძის განცხადებით, შესაძლოა, „ერთიანმა ნაციონალურმა მოძრაობამ“ სუს-ის უფროსის მოადგილის, სოსო გოგაშვილის დისკრედიტაციის მიზნით პროვოკაცია დაგეგმოს ელისო კილაძის წინააღმდეგ.

დეპუტატის თქმით, პროვოკაციის თავიდან ასარიდებლად საჭიროა კილაძის ჩართვა დაცვის პროგრამაში.

„შემთხვევითი არ არის, რომ ბოლო თვეების განმავლობაში, მიზანმიმართული შეტევა ხორციელდება ძალოვან უწყებებზე. ცდილობენ ამ უწყებების დისკრედიტაციას. მესმის ელისო კილაძის, როგორც დედის წუხილი, მაგრამ აშკარაა, რომ ის ცდილობს, შვილის საკითხი სუს-სა და იოსებ გოგაშვილს დაუკავშიროს. ამ ფონზე ჩნდება მაღალი ალბათობა, რომ ეს ფონი ვინმემ გამოიყენოს. „ნაციონალურმა მოძრაობამ“ ან სხვა დესტრუქციულმა ძალებმა დაგეგმონ გარკვეული პროვოკაცია ქალბატონი ელისოს წინააღმდეგ და მერე ეს გამოიყენონ სუს-ისა და გოგაშვილის დისკრედიტაციისთვის. ამიტომ ვფიქრობ, რომ პროკურატურამ უნდა განიხილოს ელისო კილაძის დაცვის პროგრამაში ჩართვის საკითხი“, - განაცხადა თალაკვაძემ.

ანა მებურიშვილი