პოლიტიკა

არჩევნების შემდეგ პროდასავლური პარტიები ჩამოინგრა - გიორგი ახვლედიანი

„დემოკრატიული მოძრაობის“ წევრის, გიორგი ახვლედიანის განცხადებით, ბევრი „დანგრეული“ პარტია ცდილობს ერთი პარტია მაინც შექმნას.

“არჩევნების შემდეგ ეს ეგრეთ წოდებული პროდასავლური პარტიები ჩამოიშალნენ. ზოგი გაიქცა, ზოგი წავიდა სადღაც და ახლა ცდილობენ ბევრი დანგრეული პარტიიდან ერთი მაინც შექმნან, აქ უჩვეულო არაფერია და ეს ბუნებრივიცაა. ეს თემა სერიოზულ განხილვას საჭიროებს, „დემოკრატიული მოძრაობაც“ არ გამორიცხავს იდეოლოგიურად თანხვედრ ძალებთან კონსულტაციებს, თუმცა ამაზე ჯერ საუბარი არ არის, ეს სავარაუდოდ შეიძლება ვიხილოთ 2017 წლის გაზაფხულიდან და პროცესები თავად გვიკარნახებენ თუ რა უნდა მოვიმოქმედოთ,” – განაცხადა გიორგი ახვლედიანმა.

ბურჯანაძის გუნდის წევრი დავით უსუფაშვილის პოლიტიკური მომავლითაც დაინტერესდა და პარლამენტის ყოფილ თავმჯდომარეს „რესპუბლიკელებისგან“ მკაფიო გამიჯვნა ურჩია.

“უსუფაშვილმა უნდა დაიწყოს სოლო კარიერა, ვიდრე მას აქვს შერჩენილი პარლამენტის თავმჯდომარის იმიჯი, იგი უნდა გაემიჯნოს უკვე კარგად „გასვრილ“ რესპუბლიკელებს და ან დამოუკიდებლად ან სხვა პოლიტიკურ ძალებთან ერთად განაგრძოს პოლიტიკური კარიერა,“-განაცხადა გიორგი ახვლედიანმა.

ნინო ექვთიმიშვილი