პოლიტიკა

არჩევნების შემდეგ, ახალი პარტია, კოალიცია - „კანონი და სამართალი“ გამოჩნდება - თაკო ჩარკვიანი

პუბლიცისტ თაკო ჩარკვიანის განცხადებით, არჩევნების შემდეგ ახალი პარტია გამოჩნდება სახელწოდებით „კანონი და სამართალი“. როგორც მან „პალიტრანიუსს“ განუცხადა, ის მხოლოდ კარგს ხედავს ექსპერტ გია ხუხაშვილის იდეაში მესამე პოლიტიკური ძალის შექმნის შესახებ.

„ეს მისი სურვილია და ძალიან კარგი, თუ ამაზე საუბრობს. ყველას აქვს ამის უფლება და მხოლოდ კარგს ვხედავ. მე უბრალოდ იმაზე ვისაუბრებ, ჩვენ რას ვაკეთებთ. მე დავაანონსე კიდეც ცოტა ხნის წინ, უბრალოდ არჩევნებამდე საჭიროდ არ ჩავთვალე, რადგან არ მინდოდა გრიგოლ ვაშაძეს არჩევნებში ხელი შეშლოდა. ახლა ჩვენ ყველა გაერთიანებულ ოპოზიციას ვაძლევთ ხმას, ხოლო არჩევნების შემდეგ, ახალი პარტია, რომელიც უკვე გაკეთებულია და მას ჰქვია კოალიცია - „კანონი და სამართალი“, გამოჩნდება“, - განაცხადა ჩარკვიანმა.

მისი თქმით, მესამე პოლიტიკური ძალის იდეა საპრეზიდენტო არჩევნების მეორე ტურისთვის არარეალურია, ხოლო საპარლამენტო არჩევნებისთვის ამის განხორციელება შესაძლებელია.

„ახლა მეორე ტურია. დღეს ჩვენ ქვეყანას ვკარგავთ იმ განცხადებების ფონზე, რომელსაც ხელისუფლების კანდიდატი აკეთებს. შეიძლება ვიღაცა არ გიჟდებოდა ვაშაძეზე, ასეთებიც არიან და ვიცი, რომ ისინი ხმას აძლევენ გაერთიანებულ ოპოზიციას, რადგან მათთვის წყალგამყოფი აღმოჩნდა მეჩითოვისა და ზურაბიშვილის გვერდით დგომა“, - განაცხადა ჩარკვიანმა.