პოლიტიკა

არჩევნებია ყველაფრის მაჩვენებელი - დავით სერგეენკო

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, დავით სერგეენკომ NDI-ის კვლევის შედეგებზე საუბრისას განაცხადა, რომ წინასაარჩევნო სოციოლოგიურ კვლევებსა და არჩევნების შედეგებს შორის მნიშვნელოვანი განსხვავება შეინიშნება.

„არაფერი პირადული NDI-ის ადგილობრივი ოფისის ხელმძღვანელთან, არავითარი პრეტენზია NDI-ს ინსტიტუციასთან არ მაქვს, მაგრამ მთელი ამ 6 წლის განმავლობაში, რაც მე პოლიტიკაში მომიწია ყოფნა, მნიშვნელოვანი განსხვავებებია ხოლმე წინასაარჩევნო სოციოლოგიურ კვლევებსა და არჩევნების შედეგებს შორის. ასე, რომ მე უბრალოდ არ მაქვს პასუხი გარდა იმისა, რომ არჩევნებია ყველაფრის მაჩვენებელი“, - განაცხადა სერგეენკომ.

NDI-ის კვლევის თანახმად, ხვალ რომ საპრეზიდენტო არჩევნები ჩატარებულიყო, გამოკითხულთა 15% არცერთ კანდიდატს არ მისცემდა ხმას, 12% - „ქართული ოცნების“ კანდიდატს, 10% -„ერთიანი ნაციონალური მოძრაობის“ კანდიდატს, 6% - გიორგი მარგველაშვილს, 6% - დავით ბაქრაძეს, 4%- შალვა ნათელაშვილს, 7%- სხვა კანდიდატებს.