პოლიტიკა

არასწორად მოაზროვნე უნდა ვიყო, რომ ახლა მე მარგველაშვილს ველაპარაკო პოლიტიკური პარტიის შექმნაზე- დავით უსუფაშვილი

რესპუბლიკური პარტიის ყოფილი თავმჯდომარის დავით უსუფაშვილის განცხადებით, ბიძინა ივანიშვილს აქვს სურვილი „ქართულ ოცნებას“ ოპოზიცია შეუქმნას.

ამის შესახებ უსუფაშვილმა „ტვ პირველის“ ეთერში ჟურნალისტის მიერ დასმული კითხვის საპასუხოდ განაცხადა, ხომ არ იგეგმება მომავალში დავით უსუფაშვილი ვიხილოთ ბიძინა ივანიშვილის მიერ შექმნილი ახალი ოპოზიციური ძალის სათავეში, ან ხომ არ იმოქმედებს დავით უსუაფშვილი პრეზიდენტთან ერთად?

„ბიძინა ივანიშვილს აქვს თუ არა სურვილი რომ „ოცნებას“ შეუქმნას ოპოზიცია თავისივე შექმნილი , მე არ გამოვრიცხავ ამას. არათუ გამოვრიცხავ, თითქმის მჯერა, რომ მას ასეთი სურვილი ალბათ აქვს. ბიძინა ივანიშვილს აქვს ძალიან ფართო გაქანება. მან ეს დაამტკიცა თავისი მოქმედებებით. მაგრამ ერთი რამე არის ძალიან მკაფიო და ნათელი, რომ მე ბიძინა ივანიშვილის გეგმების მიხედვით ჩემს წინ პოლიტიკური ცხოვრება რომ დამენახა, მაშინ ამას მარტივი ფორმით მოვახერხებდი“,-აღნიშნა პოლიტიკოსმა.

რაც შეეხება გიორგი მარგველაშვილს, უსუფაშვილის თქმით,ის არის ქვეყნის პრეზიდენტი, რომლის უმთავრესი ძალა, მისი წონა, როლი და ფუნქცია სახელმწიფო სისტემაში არის, მისი პოლიტიკური ნეიტრალობა.

„მე ისევ უნდა ვიყო ამ ქვეყნის დამაქცევარი, ანუ არასწორად მოაზროვნე, რომ ახლა მე მარგველაშვილს ველაპარაკო იმაზე, რომ მოდი პოლიტიკური პარტია შევქმნათ და შენ ამ თამაშში ჩაები და სხვა. მე მასთან ამ თემაზე არანაირი საუბარი არ მქონია. მე მასთან სიამოვნებით ქვეყნის პოლიტიკური სისტემის მომავალზე ვისაუბრებდი“,-განაცხადა უსუფაშვილმა.

მონიკა დავლიანიძე