პოლიტიკა

არასერიოზული, არაკომპეტენტური, არაკვალიფიცური და სასაცილოა ქალთა მოძრაობის მიერ გაკეთებული განცხადებები - დიმიტრი გაბუნია

პრეზიდენტის საპარლამენტო მდივანმა დიმიტრი გაბუნიამ ქალთა უფლებადამცველი ორგანიზაციების მიერ მისი მისამართით გაკეთებულ განცხადებებს არასერიოზულ, არაკომპეტენტურ, არაკვალიფიცურ და სასაცილო უწოდა. გაბუნიას თქმით, არ შეიძლება მისი გაიგივება სექსუალურ შევიწროებაში ბრალდებულ ზვიად დევდარიანთან, რომლის ინტერესებს ის იცავდა.

გარდა ამისა, პრეზიდენტის საპარლამენტო მდივანმა ქალთა უფლებადამცველი ორგანიზაციები ორმაგ სტანდარტებში დაადანაშაულა საარჩევნო პერიოდში სალომე ზურაბიშვილის მიმართ გაკეთებული განცხადებების გამო.

„ერთხელ და სამუდამოდ რომ დავასრულოთ ინსინუაციები ამ ყოველგვარ ცრუ ბრალდებებზე. ადვოკატთა ასოციაციამ გააკეთა საკმაოდ კომპეტენტური განცხადება. გაეროს კონვენციის მე-18 მუხლის შესაბამისად, არ შეიძლება ადვოკატის გაიგივება კლიენტთან. აქ გაიგივებულია, თითქოს,მე თუ წარმოვადგენდი ერთი კონკრეტული პირის ინტერესებს, მე ვიზიარებ ან არ ვიზიარებ მის პოზიციას.

რაც შეეხება იმ აზრს, თითქოს მე როგორც პრეზიდენტის საპარლამენტო მდივანი ხელს შევუშლი სექსუალური უმცირესობების კანონპროექტს და ა.შ., მე ისინი მინდა დავამშვიდო. საპარლამენტო მდივანს ამ კანონპროექტზე რაიმე სახის გავლენის მოხდენა არ შეუძლია.

დაანებონ თავი ორმაგი სტანდარტებით განცხადებების კეთებას. არჩევნების მეორე ტურის განმავლობაში ეს ხალხი არცთუ ისე სასიამოვნო ტერმინებით ამკობდა ქალბატონ სალომე ზურაბიშვილს. არასერიოზული, არაკომპეტენტური, არაკვალიფიცური და სასაცილოა ამ მოძრაობის მიერ გაკეთებული განცხადებები. მე მათ ვურჩევდი, გაიარონ იურიდიული კონსულტაციები და ცრუ ბრალდებებს მოეშვან. დასაშვები კრიტიკის ზღვარი, სადაც იქნება გადაცილებული, ისინი მიიღებენ სამართლებრივ პასუხს“, - განაცხადა გაბუნიამ.

საპარლამენტო მდივანმა ასევე გააკრიტიკა საპარლამენტო უმრავლესობის წევრი დიმიტრი ცქიტიშვილი, რომელმაც განაცხადა, რომ ის დიმიტრი გაბუნიას პრეზიდენტის საპარლამენტო მდივნად არ დანიშნავდა.

„დიმიტრი ცქიტიშვილი ვინ არის, უკაცრავად? საბედნიეროდ, პრეზიდენტის საპარლამენტო მდივნის დანიშვნა დიმიტრი ცქიტიშვილის გადასაწყვეტი არ არის - ეს მის კომპეტენციას სცილდება. მე ბატონ დიმიტრის ვთხოვ, პარლამენტის წევრის უფლებამოსილება საკუთარი კომპეტენციის ფარგლებში განახორციელოს“,- განაცხადა გაბუნიამ.

ცნობისთვის, 2018 წლის დეკემბრის დასაწყისში „ქალთა მოძრაობისა“ და არასამთავრობო ორგანიზაციების ნაწილმა საქართველოს ახლად არჩეულ პრეზიდენტ სალომე ზურაბიშვილს მიმართა და მოუწოდა, პრეზიდენტის საპარლამენტო მდივნად დიმიტრი გაბუნიას კანდიდატურის განხილვის გადაწყვეტილებას გადახედოს.