პოლიტიკა

არასამთავრობო სექტორი პრეზიდენტის ვეტოების დაძლევის შემთხვევაში საკონსტიტუციო სასამართლოს მიმართავს

სამოქალაქო სექტორი კანონდარღვევად აფასებს თვითმმართველობის კოდექსში შეტანილ ცვლილებებს და პარლამენტის მიერ მიღებულ დადგენილებას, რომელიც თვითმმართველი ერთეულების გაერთიანებას ეხება.

არასამთავრობო ორგანიზაციებში განმარტავენ, რომ პარლამენტის მიერ პრეზიდენტის ვეტოების დაძლევის შემთხვევაში, მიღებული ცვლილებების არაკონსტიტუციურად ცნობას მოითხოვენ და შესაბამისი სარჩელით საკონსტიტუციო სასამართლოს მიმართავენ.

საქართველოს სტრატეგიული კვლევებისა და განვითარების ცენტრის მთავარი სპეციალისტის, ლევან ალაფიშვილის განცხადებით, საკითხზე აქტიური კონსულტაციები მიმდინარეობს პოლიტიკურ პარტიებთანაც.

„მარტოა დარჩენილი ხელისუფლება იმის იმედად, რომ მას აქვს კონსტიტუციური უმრავლესობა პარლამენტში. ეს არ არის გარანტია იმისა, რომ ეს პოლიტიკური ძალა შეინარჩუნებს ლეგიტიმაციას. არ შეიძლება ამ გზით სიარული და მე იმედი მაქვს, რომ იმსჯელებენ და მიიღებენ გადაწყვეტილებას. იგეგმება საკონსტიტუციო სასამართლოსადმი მიმართვა სხვადასხვა საკითხებზე, რომელიც დაკავშირებულია თვითმმართველობასთან და თვითმმართველობის საკითხებთან,“ - განაცხადა ლევან ალაფიშვილმა.

ნინო ექვთიმიშვილი