პოლიტიკა

არასამთავრობო ორგანიზაციები თვითმმართველი ქალაქის გაუქმების საკითხზე ხელისუფლებისა და სამოქალაქო საზოგადოების წარმომადგენლებს შორის შეხვედრას ითხოვენ

არასამთავრობო ორგანიზაციები 7 თვითმმართველი ქალაქის გაუქმებისა და მათთვის სათემო მუნიციპალიტეტებთან გაერთიანების თაობაზე ხელისუფლების ინიციატივას აკრიტიკებენ და გადაწყვეტილების ხელისუფლებისა და სამოქალაქო საზოგადოების წარმომადგენლებს შორის შეხვედრის გამართვას ითხოვენ.

ამ მიზნით 21 არასამთავრობო ორგანიზაცია პარლამენტის რეგიონული პოლიტიკისა და თვითმმართველობის კომიტეტსა და რეგიონული განვითარებისა და ინფრასტრუქტურის სამინისტროს მიმართავს.

აღნიშნულთან დაკავშირებით, პრესკონფერენცია არასამთავრობო ორგანიზაციებმა თბილისის გარდა კიდევ ოთხ ქალაქში თელავში, ოზურგეთში, ზუგდიდსა და გორში ჩაატარეს.

"კანონპროექტის შემუშავების პროცესი წარიმართა საზოგადოების წარმომადგენლების და ექსპერტების ყოველგვარი ჩართულობის გარეშე", - აცხადებენ არასამთავრობო ორგანიზაციების წარმომადგენლები.

როგორც მესამე სექტორში აღნიშნავენ, იგეგმება თვითმმართველი ქალაქებისთვის თვითმმართველი თემის შეერთება, რაც რეალურად ნიშნავს თვითმმართველობის უფლების დაკარგვას, როგორც 7 ქალაქისთვის, ისე თვითმმართველ თემში შემავალი სოფლებისთვის.

ასევე, მათი თქმით, გარკვეულ ზეწოლას აქვს ადგილი ამ მუნიციპალიტეტების ადგილობრივი ხელისუფლების წარმომადგენლებზე, იმ მიზნით, რომ საკრებულოში უმოკლეს დროში განიხილონ და მხარი დაუჭირონ სამინისტროს ამ ინიციატივას.

არასამთავრობო ორგანიზაციები აღნიშნული ინიციატივის მიმართ სამოქალაქო სექტორის ნეგატიურ დამოკიდებულებაზეც საუბრობენ და აცხადებენ, რომ ხელისუფლებამ დაუმალა მოსახლეობას, რომ ცვლილებათა პაკეტი მზადაა და ეს საკითხი დღის წესრიგში უახლოეს მომავალში დადგება.

მესამე სექტორს დაუშვებლად მიაჩნია ასეთი მნიშვნელოვანი ცვლილებების და განხორციელების პროცესის მომზადება საზოგადოების ზურგს უკან.

ისინი პრეზიდენტს მიმართავენ, დანიშნოს ადგილობრივი თვითმმართველობის არჩევნების თარიღი და ამბობენ, რომ ეს ერთადერთი საშუალებაა, რათა ინიციატივის განხორციელებამ მინიმუმ 2022 წლამდე გადაიწიოს.

მიმართვას ხელს აწერს 21 არასამთავრობო ორგანიზაცია, მათ შორის ,,საქართველოს ახალგაზრდა იურისტთა ასოციაცია,’’ „საერთაშორისო გამჭვირვალობა“ და ფონდი „ღია საზოგადოება საქართველო“.