პოლიტიკა

არანაირ პნევმატურ იარაღზე არ არის საუბარი, ესაა სათამაშო იარაღი, რომელიც ჩემს სახლშიც არის - ზვიად ფხაკაძე

ხორავას ქუჩაზე მოზარდების მკვლელობის საქმის პროკურორის, ზვიად ფხაკაძის განცხადებით, სიმართლეს არ შეესაბამება ინფორმაცია, რომ მოზარდებს შორის შელაპარაკებისას პნევმატური იარაღი გამოიყენეს.

პროკურორის თქმით, სასამართლოზე დადგინდა, რომ საქმეში სათამაშო იარარი ფიგურირებდა.

„არანაირ პნევმატურ იარაღზე არ არის საუბარი. ეს არის სათამაშო იარაღი, რომელიც ჩემს სახლშიც არის. იმიტომ, რომ პატარა შვილები მყავს, რომლებიც თამაშობენ ამ პატარა სათამაშო იარაღით, პლასტმასის არის და გაისვრის ხოლმე პატარა ყვითელ ბურთულებს, რომლებიც სანტიმეტრის ზომისაც არ არის, მე მგონი, ეს ყველას გეცოდინებათ. სწორედ ასეთი სათამაშო პისტოლეტი იყო, არანაირი პნევმატური იარაღი“, - განაცხადა ფხაკაძემ პარლამენტში მიმდინარე საგამოძიებო კომისიის სხდომაზე.

ცნობისთვის, ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის დღევანდელ სხდომაზე შინაგან საქმეთა სამინისტროს წარმომადგენელ კახა სირაძესა და საქმის პროკურორ ზვიად ფხაკაძეს უსვამენ კითხვებს.