პოლიტიკა

არალეგიტიმური განცხადებების მიუხედავად, ქართული მხარე ყველაფერს აკეთებს ცხედრის რაც შეიძლება მოკლე დროში გადმოსასვენებლად - მამუკა მდინარაძე

ფრაქცია „ქართული ოცნების“ თავმჯდომარის, მამუკა მდინარაძის განცხადებით, ოკუპირებული ცხინვალის რეგიონის დე-ფაქტო პრეზიდენტის, ანატოლი ბიბილოვის კომენტარი არჩილ ტატუნაშვილის ცხედრის გადმოცემის შესახებ „აბსოლუტურად მიუღებელია და ის ყველა საერთაშორისო ნორმასა და სტანდარტს ეწინააღმდეგება“.

მდინარაძემ აღნიშნა, რომ ქართული მხარე ყველაფერს აკეთებს, რათა ცხედრის გადმოცემა რაც შეიძლება მალე მოხდეს.

„ასეთი არალეგიტიმური განცხადებების მიუხედავად, ქართული სახელმწიფო ყველაფერს აკეთებს იმისათვის, რომ არჩილ ტატუნაშვილის ცხედარი თავის ოჯახში, რაც შეიძლება მოკლე დროში იყოს გადმოსვენებული. ნამდვილად ვერ გეტყვით, ე.წ. პრეზიდენტს რა მიზანი ამოძრავებს, როცა ამ განცხადებას აკეთებს. ჩვენ იგივე მოლოდინი გვაქვს, რადგან ყველაფერს ვაკეთებთ, ცხედრის ჩვენს კონტროლირებად ტერიტორიაზე გადმოსვენებისთვის. იგივე მოლოდინში იმას ვგულისხმობ, რომ ცხედრის გადმოსვენებას უახლოეს მომავალში ველოდებით“, – განაცხადა მდინარაძემ.

ბიბილოვმა ჟენევის მოლაპარაკებების თანათავმჯდომარესთან შეხვედრაზე განაცხადა, რომ ცხედრის გადმოცემამდე უნდა ჩატარდეს ცხედრის სასამართლო-სამედიცინო ექსპერტიზა, რომელიც დროს მოითხოვს.

„მშვენივრად ხვდებით, რომ ცხედრის გადმოცემისთვის საჭიროა სასამართლო-სამედიცინო ექსპერტიზის ჩატარება. ეს მიღებულია ევროპაშიც და ამერიკაშიც. მაგალითად, იმავე საქართველოში სასამართლო ექსპერტიზაზე მიდის მინიმუმ ერთი თვე. არავინ არ ამბობს, რომ ტატუნაშვილის ცხედარი არ უნდა იყოს გადაცემული, თუმცა ასეთი პოზიცია ასევე აქვს ჩვენს საზოგადოებას, რადგან უგზო-უკვლოდ დაკარგულად ჩვენთან 150 ადამიანი მიიჩნევა, რომლის ბედზე მათმა ახლობლებმა არაფერი არ იციან. თუმცა ამისგან პოლიტიკას არ ვქმნით“, -თქვა ბიბილოვმა.

ცნობისთვის, საოკუპაციო ძალებმა 22 თებერვალს ახალგორის რაიონში საქართველოს სამი მოქალაქე : არჩილ ტატუნაშვილი, ლევან ქუტაშვილი და იოსებ პავლიაშვილი დააკავეს. მომდევნო დღეს ოსურ მედიაში გავრცელდა ინფორმაცია ტატუნაშვილის დაღუპვის შესახებ. ქართული მხარისა და უშუალოდ ტატუნაშვილის მოთხოვნის მიუხედავად, ცხედრის გადმოცემა ამ დრომდე არ მომხდარა.