პოლიტიკა

„არა ნაცებს! არა ბოროტებას!“ - აგრესიული შინაარსის ბანერები ბიზნესმენ ალექსანდრე მეგუთნიშვილის დაკვეთითაა გაკეთებული

თბილისში გამოჩენილი აგრესიული შინაარსის ბანერები წინანდლის ღვინის ქარხნის მფლობელის ალექსანდრე მეგუთნიშვილის დაკვეთითაა გაკეთებული. ეს თავად მეგუთნიშვილმა დაადასტურა „რუსთავი 2“-თან სატელეფონო საუბარში.

ბინესმენმა ამაში 50 000 ლარზე მეტი დახარჯა.

მეგუთნიშვილის თქმით, ის წინა ხელისუფლების დროს სრულიად უკანონოდ იყო დაკავებული და ამ ფორმით მან საკუთარი პოზიციის გამოხატვა სცადა. ბიზნესმენმა დაამატა, რომ პირები, ვინც მაშინ მას თანხა გამოსძალეს, ამ დრომდე ხელისუფლებაში რჩებიან.

მეგუთნიშვილის ინფორმაციით, „ქართულ ოცნებასთან“ ბანერებთან დაკავშირებულ ყველა ტექნიკურ დეტალს მისგან დამოუკიდებლად მირიან ყარაულაშვილი აგვარებდა.

„ჯერ კიდევ მუშაობენ ის ადამიანები, ვინც ჩემს დაჭერაში მიიღო მონაწილეობა. ის ვისთანაც ფული მივიტანე, დღეს ამ ხელისუფლებას კი უზის ბუნების დაცვაში და მეორე დღესაც სუს-ში მუშაობს. ეს ვერ ვაპატიე ამათ. მე მოვითხოვე, რომ ბანერზე ეგენიც ყოფილიყვნენ გამოკრულები, მაგრამ მსხვილები დაბეჭდეს, ეგეც სასაყვედურო მაქვს. დიზაინი ჩემთან ერთად შეარჩიეს, მომეხმარნენ. ვინ დამეხმარა და ჩემი მეგობარია ერთ-ერთ პიროვნება, რომელიც მუშაობს „ქართულ ოცნებაში“, მირიან ყარაულაშვილი. მე ჩემი ფეხით მივედი. 10 დღეზე მეტია დავდივარ თბილისში კონსულტაციებზე. მე ვთხოვე, ამ 50 ათასი ლარის ფარგლებში მინდა, რომ შევწირო. მირიანი აგვარებდა ყველაფერს. სალომე ზურაბიშვილის კამპანია მე დავაფინანსე ბანერებით“, -განაცხადა ბიზნესმენმა.

გუშინ თბილისში ახალი ბანერები გაჩნდა წარწერით „ არა ნაცებს! არა ბოროტებას!“ , რომლებზეც წითელ არიან გამოსახული მიხეილ სააკაშვილი, ვანო მერაბიშვილი, ბაჩო ახალაია, ნიკა გვარამია, ზურაბ ადეიშვილი და სხვები.