პოლიტიკა

არა მგონია უმრავლესობამ პრეზიდენტის შენიშვნები გაითვალისწინოს - დავით მათიკაშვილი

საპარლამენტო უმრავლესობა საგაზაფხულო სესიის ფარგლებში პრეზიდენტის მიერ „საერთო სასამართლოების მესამე ტალღის“ კანონპროექტზე დადებული ვეტოს დაძლევას აპირებენ.

„ქართული ოცნების“ წევრის დავით მათიკაშვილის განცხადებით, უმრავლესობა არ გაიზიარებს პრეზიდენტის შენიშვნებს.

„ჩემი აზრით, ის შენიშვნები, რომელიც იქნა პრეზიდენტის მიერ წარმოდგენილი, არცთუ ისე დასაბუთებულია და გათვალისწინებული რამდენად იქნება უმრავლესობის შიგნით , ნაკლებ სავარაუდოა, რომ იყოს გათვალისწინებული“, - თქვა მათიკაშვილმა.

საპარლამენტო უმცირესობის წევრის გიორგი ტუღუშის თქმით, უმრავლესობის პოზიცია შემდგომში სასამართლოს დამოუკიდებლობაზე იმოქმედებს.

„ძალიან სამწუხაროა, თუ ამდაგვარ მიდგომას იჩენს უმრავლესობა ესოდენ მნიშვნელოვანი კანონის მიმართ, თუმცა ამავდროულად ისიც უნდა აღვნიშნოთ, რომ ამ კანონში ჩარჩენილი პრობლემები მომავალში , რა თქმა უნდა, აისახება სასამართლოს დამოუკიდებლობის სისუსტეზეც“, - განაცხადა ფრაქციის „მოძრაობა თავისუფლებისთვის - ევროპული საქართველო“ წევრმა.

შეგახსენებთ, რომ საქართველოს პრეზიდენტმა ერთი თვის წინ დაადო ვეტო მესამე ტალღის პროცესს. გიორგი მარგველაშვილის თქმით, ის დაეყრდნო ვენეციის კომისიის შენიშვნებს.

ხვალ პარლამენტში საგაზაფხულო სესია იხსნება.

ანა მებურიშვილი