პოლიტიკა

არა მგონია, შინაგან საქმეთა მინისტრის დაბარება უკავშირდებოდეს ჩემს ანგარიშს - სახელმწიფო დაზვერვის სამსახურის უფროსი

საქართველოს სახელმწიფო დაზვერვის სამსახურის უფროსმა, დავით სუჯაშვილმა გამორიცხა, რომ შინაგან საქმეთა მინისტრის, გიორგი გახარიას პარლამენტში დაბარების მოთხოვნა უკავშირდებოდეს თავდაცვისა და უშიშროების საპარლამენტო კომიტეტის დახურულ სხდომაზე სუჯაშვილის მიერ წარდგენილ ანგარიშს.

„არა მგონია, შინაგან საქმეთა მინისტრის დაბარება უკავშირდებოდეს ჩემს ანგარიშს. მე როგორც ვიცი, დაგეგმილი იყო ეს შეხვედრა“, -თქვა სახელმწიფო დაზვერვის სამსახურის უფროსმა.

სუჯაშვილის განცხადებით, დაზვერვის სამსახური სხვადასხვა სახელმწიფო უწყებასთან აქტიურად თანამშრომლობს.

„ვფიქრობ, ძალიან კარგად, გამართულად მუშაობენ უწყებები. ჩვენ არა მარტო უსაფრთხოების სამსახურთან და შინაგან საქმეთა სამინისტროსთან, სხვა სამინისტროებთანაც გვაქვს ძალიან მჭიდრო ურთიერთობა და ხდება ინფორმაციის ინტენსიური გაცვლა“, - განაცხადა სუჯაშვილმა.

გიორგი გახარიას პარლამენტში დაბარება ფრაქცია ენმ-ის წევრმა სალომე სამადაშვილმა მოითხოვა სახელმწიფო დაზვერვის სამსახურის უფროსის მიერ წარდგენილი ანგარიშის მოსმენის შემდეგ. დეპუტატის განმარტებით, დღევანდელ ხელისუფლებას არ აქვთ შესაძლებლობა, ან სურვილი, ქვეყნის წინაშე მდგარი საფრთხეები გაანეიტრალოს.