პოლიტიკა

არ ვიქნებოდით წინააღმდეგი, თუკი ირმა ინაშვილი ყოფილიყო მერობის საერთო კანდიდატი-ნინო ბურჯანაძე

„დემოკრატიული მოძრაობის“ ლიდერი ნინო ბურჯანაძე წინააღმდეგი არ იქნებოდა, თუ ერთიანი ოპოზიციის მერობის კანდიდატი „პატრიოტთა ალიანსის“ ლიდერი ირმა ინაშვილი ყოფილიყო.

თუმცა, ბურჯანაძის თქმით, „პატრიოტთა ალიანსის“ წარმომადგენლები ბოლო წუთამდე არ პასუხობდნენ, რას გეგმავდნენ მერობის კანდიდატთან დაკავშირებით.

„ჩვენ არ ვიქნებოდით წინააღმდეგი, თუკი პრინციპულ საკითხად იქნებოდა დაყენებული, რომ “პატრიოტთა ალიანსის” ლიდერი ირმა ინაშვილი ყოფილიყო მერობის საერთო კანდიდატი. ამაზე კახა კუკავა და დიმიტრი ლორთქიფანიძე თანახმა იყვნენ.

ჩვენი კონკურენტი არის ხელისუფლება, მას აქვს ძალიან სერიოზული ფინანსურ-ადმინისტრაციული რესურსი, მაგრამ დარწმუნებული ვარ, ის მორალური უპირატესობა, რომელიც ჩვენ გვაქვს ხელისუფლებასთან და ყველა სხვა ოპოზიციურ პარტიასთან, ნამდვილად მოგვცემს გარდატეხის შეტანის შესაძლებლობას.

ყველა ოპოზიციური პარტია გაემიჯნა მოლაპარაკებებს, ყველა საკუთარ პარტიულ ინტერესებზე ფიქრობს. ხშირ შემთხვევაში ვაჭრობს და გარიგებებშია შესული და უმეტეს შემთხვევაში ამოცანად ისახავს, მოუგოს ან ბურჯანაძეს ან რომელიმე სხვა პარტიას და არა იმას, რომ ხელისუფლება რეალურად შეიცვალოს.

დააკვირდით ოპოზიციონერების გამოსვლებს. ყველა თავს არიდებს ბიძინა ივანიშვილის კრიტიკას, სამაგიეროდ, აკრიტიკებენ ბიძინა ივანიშვილის თანაგუნდელებს, იმიტომ რომ გარიგება ივანიშვილთან ხელსაყრელია“, - განაცხადა ბურჯანაძემ.

„დემოკრატიულმა მოძრაობამ“ და „თავისუფალმა საქართველომ“ მერობის კანდიდატად კახა კუკავა წარადგინა, ხოლო საკრებულოს თავმჯდომარეობის კანდიდატად - დიმიტრი ლორთქიფანიძე.