პოლიტიკა

არ ვფიქრობ და არ მჯერა რომ მათ რაიმე „ჩაუდეს“ - დავით სერგეენკო

საქართველოს შრომის, ჯანმრთელობისა და სოციალური დაცვის მინისტრი, დავით სერგეენკო ჯგუფ „ბირჟა მაფიის“ რეპერების საქმეს გამოეხმაურა.

სერგეენკო არ ფიქრობს, რომ პროკურატურის გადაწყვეტილებაზე, მუსიკოსების გათავისუფლების შესახებ , რომელიმე პირის განცხადებას მოეხდინა გავლენა. მინისტრი გამორიცხავს ვერსიას, რომ რეპერებს ნარკოტიკები ჩაუდეს.

„არ ვფიქრობ და არ მჯერა, რომ მათ რაიმე „ჩაუდეს“. მე არ ვფიქრობ, რომ პროკურატურაზე ზეგავლენა შეიძლება მოეხდინა რაიმე განცხადებას. პროკურატურას თავისი ცალსახად განსაზღვრული მოქმედების პროტოკოლი აქვს. ვფიქრობ, გამოძიებამ და სასამართლომ მიიღო ის გადაწყვეტილება, რაც მიიღო. ჩემი პირადი აზრია, რომ მე ალბათ, ნაკლებად უნდა ჩავერიო მათი მუშაობის პროტოკოლში”, - განაცხადა სერგეენკომ.

ჯგუფ „ბირჟა მაფიის“ წევრები, მიშკა მგალობლიშვილი და გიორგი ქებურია ნარკოდანაშაულის ბრალდებით 7 ივნისს დააკავეს. 9 ივნისს საქალაქო სასამართლომ მათ წინასწარი ორთვიანი პატიმრობა შეუფარდა. ჯგუფის წევრების თქმით, მათი დაკავების მიზეზი გახდა კლიპი „tsl shavi zeda“, სადაც პოლიციელი იყო გაშარჟებული.

გუშინ კი თბილისის სააპელაციო სასამართლომ ჯგუფ „ბირჟა მაფიის“ წევრი გიორგი ქებურია 20 000-ლარიანი გირაოს საფუძველზე გაათავისუფლა.

ასევე გაათავისუფლეს ჯგუფის მეორე წევრი, მიშკა მგალობლიშვილი. მას 50 000-ლარიანი გირაო (უძრავი ქონების გარანტიით) აქვს შეფარდებული.

ანა მებურიშვილი