პოლიტიკა

არ შეიძლება ტრაგედიის პოლიტიკურ ჭრილში გადატანა - დავით მათიკაშვილი ზაზა სარალიძის მოთხოვნაზე

„ზაზა სარალიძის მიმართ დიდი პატივისცემისა და ხორავას ქუჩაზე დატრიალებული დიდი ტრაგედიის მიუხედავად, მოთხოვნა ხელისუფლების გადადგომის თაობაზე გადამეტებულია, არ შეიძლება საკითხის პოლიტიკურ ჭრილში გადატანა“, - ამის შესახებ ჟურნალისტებს საპარლამენტო უმრავლესობის წევრმა დავით მათიკაშვილმა განუცხადა.

მისივე თქმით, ხორავას ქუჩაზე მომხდარი მკვლელობის საქმეს სასამართლოში განიხილავენ, ხოლო შსს-ში მისი გამოძიება გრძელდება.

„საზოგადოებამ კარგად დაინახა, რომ ხელისუფლება იყო აბსოლუტურად ღია და გახსნილი ყველა იმ პროცესთან დაკავშირებით, რაც ხორავას ქუჩაზე მომხდარ ტრაგედიას უკავშირდებოდა. ხელისუფლებამ გააკეთა და აკეთებს აბსოლუტურად ყველაფერს, რომ არცერთი კითხვა არ დარჩეს. არ შეიძლება ტრაგედიის პოლიტიკურ ჭრილში გადატანა. ჩვენ ყველანი ვართ ზაზა სარალიძის თანამოაზრე იმ ნაწილში, რომ გვსურს, ყველა კითხვას გაეცეს პასუხი, რისთვისაც სახელმწიფომ ყველაფერი გააკეთა. ჩვენი მხრიდან უპრეცედენტო ნაბიჯი გადაიდგა, როდესაც პარლამენტში საგამოძიებო კომისია შეიქმნა და კომისიაში უმრავლესობის ფუნქცია საპარლამენტო უმცირესობას გადაეცა. ჯერ კიდევ წინ არის სასამართლო პროცესი ამ საქმეზე და ასევე საქმის კონკრეტულ ნაწილში შინაგან საქმეთა სამინისტროში გამოძიება მიმდინარეობს“, - უთხრა დეპუტატმა მედიას.

ცნობისთვის, გუშინდელ აქციაზე ზაზა სარალიძემ მთავრობას 24-საათიანი ვადა მისცა, რათა ის გადადგეს და შეიქმნას დროებითი მთავრობა, რომელიც ვადამდელი საპარლამენტო არჩევნების ჩატარებას უზრუნველყოფს.