პოლიტიკა

არ შეიძლება მთავრობასთან კორუფციულ გარიგებაში შესვლა , რადგან ასე არ იმართება ქვეყანა - ნატო ჩხეიძე

ტელეკომპანია ,,იბერიას“ დამფუძნებელი, პარლამენტის წევრი ნატო ჩხეიძე ამბობს, რომ საგამოძიებო უწყებები არ დაინტერესებულან ქვეყანაში კორუფციულ ფაქტებთან დაკავშირებით მის მიერ გაკეთებული განცხადებებით.

,,შესაძლებელია იმიტომაც არ დაინტერესებულან, რომ იციან, ბევრი რამ ვიცი და არ უნდათ, რომ ეს ბევრი რამ მოისმინონ“, - განაცხადა ,,იბერიას“ ეთერში ნატო ჩხეიძემ.

დეპუტატმა ხაზი გაუსვა იმას, რომ მისთვის გასაკვირია, რატომ ამართლებენ შექმნილ ვითარებას და კორუფციას მისი კოლეგები საპარლამენტო უმრავლესობიდან. მისი თქმით, მმართველი გუნდის მხრიდან მსგავსი რეაქცია გასაკვირია, რადგან ,,ქართული ოცნება“ სწორედ ,,ფარული ჩანაწერების შედეგად მოვიდა ხელისუფლებაში.“

ნატო ჩხეიძე დარწმუნებულია, რომ საგამოძიებო უწყებები ,,ომეგა ჯგუფის“ საქმესთან დაკავშირებული აუდიოჩანაწერების ავთენტურობის დადგენასაც გააჭიანურებენ.

დეპუტატმა აღნიშნა ისიც, რომ ის პირები, რომლებიც ფიგურირებენ ფარულ ჩანაწერებში, ნამდვილად ცდილობდნენ შეეყვანათ ,,ომეგა ჯგუფი“ კორუფციულ გარიგებებში.

,,არ შეიძლება მთავრობასთან კორუფციულ გარიგებაში შესვლა, იმიტომ, რომ ასე არ იმართება ქვეყანა. ჭაობი დაარქვით, მორევი დაარქვით , განუვითარებლობა ხდება ქვეყანაში, როდესაც ის ადამიანები, რომლებიც ხელისუფლებაში არიან და ქვეყანაზე აქვთ პასუხისმგებლობა, თავიანთი ვიწრო ინტერესების იქით არ იხედებიან“, - განაცხადა ნატო ჩხეიძემ.