სამართალი

არ გამოვრიცხავ, რომ ჩემი მანქანის აფეთქების საქმეში მთავარი ბრალდებული დავით ხეჩუაშვილი ლიკვიდირებულია - გივი თარგამაძე

არ გამოვრიცხავ, რომ ჩემი მანქანის აფეთქების საქმეში მთავარი ბრალდებული დავით ხეჩუაშვილი ლიკვიდირებულია, - განაცხადა „ევროპული საქართველოს“ ერთ-ერთმა ლიდერმა გივი თარგამაძემ მისი კუთვნილი ავტომანქანის აფეთქების საქმეზე საუბრისას.

როგორც თარგამაძემ აღნიშნა, მისთვის ცნობილია უშუალოდ ტერაქტის განმახორციელებელი ყველა პირი, ასევე ცნობილია მასთან დაკავშირებული პირები.

„ვაპირებ გავაგრძელო ჩემი საკუთარი გამოძიება. საკმაოდ შორს ვარ წასული. პრაქტიკულად, ჩემთვის ცნობილია უშუალოდ ტერაქტის განმახორციელებელი ყველა პირი, ასევე ცნობილია მასთან დაკავშირებული პირები. ისინი გამოკვეთილია გამოძიებაშიც, მაგრამ მათ მიმართ არ ტარდება არც ოპერატიული და არც პროცესუალური მოქმედებები. ჩემთვის ასევე ცნობილია დაკვეთის მიმართულება, ეს არის როგორც რუსული ასევე ქართული სპეცსამსახურები და პოლიტიკური ხელმძღვანელობა. ასევე ამ ქვეყნის არაფორმალური მმართველი ბიძინა ივანიშვილი. დასაზუსტებელი დამრჩა ის დამკვეთები, რომლებმაც ჩემი პერსონიფიცირება მოახდინეს, როგორც ტერორისტული აქტის ობიექტის და მოსაძიებელი მაქვს დამატებით მტკიცებულებები, რომლებიც ჩემი გამოძიების შედეგებს გაამაგრებს. ამას მე გავაკეთებ და მაშინ, როდესაც სასამართლო იქნება იმ კონდიციაში, რომ ასეთი საქმეები განიხილოს, განიხილავს კიდეც“, - განაცხადა თარგამაძემ.

ამასთან, ,,ევროპული საქართველოს’’ წევრი არ გამორიცხავს, რომ ხეჩუაშვილი შესაძლოა, ლიკვიდირებული იყოს.

თარგამაძე ხეჩუაშვილის ადვოკატს მიმართავს, რომ თუ ხეჩუაშვილი მოსკოვში სამუშაოდ იმყოფება, ამის დამადასტურებელი დოკუმენტი წარმოადგინოს.

„ხეჩუაშვილი აბრამიშვილისგან განსხვავებით, რომელიც მოსკოვში ჩანს ჩემზე განხორციელებული ტერაქტის საქმესთან დაკავშირებულ ადამიანებთან ერთად, ხეჩუაშვილი აფეთქების შემდეგ საერთოდ არსად არ გამოჩენილა. ჩემი მცდელობები, მისი გადაადგილების შესახებ რაიმე ინფორმაციის მოძიებაზე უშედეგოა. აქედან გამომდინარე, მე არც იმას გამოვრიცხავ, რომ ხეჩუაშვილი საერთოდ ლიკვიდირებული იყოს. თუ ადვოკატი კონკრეტულად იძახის, რომ ხეჩუაშვილი მოსკოვში მუშაობს, კარგი იქნება თუ ამის ცნობასაც წარმოადგენს“, - განაცხადა გივი თარგამაძემ.

ნინო ექვთიმიშვილი