პოლიტიკა

არ გამოვრიცხავ, ხელახლა გავასაჩივროთ ე.წ. ფარული მოსმენების კანონი - უჩა ნანუაშვილი

სახალხო დამცველი, უჩა ნანუაშვილი ე.წ. ფარული მოსმენების კანონპროექტის ბიუროს სხდომაზე განხილვას ეხმაურება. ომბუდსმენის თქმით, კანონში არაა გამოსწორებული ის ხარვეზები, რომელზეც საკონსტიტუციო სასამართლომ მიუთითა.

ნანუაშვილი ასევე არ გამორიცხავს, რომ ომბუდსმენის აპარატმა ფარულ საგამოძიებო მოქმედებების ახალ კანონზე საჩივარი შეიტანოს საკონსტიტუციო სასამართლოში.

„მთელი რიგი ხარვეზები, რომლებიც კანონში იყო, შენარჩუნებულია. არ გამოვრიცხავ, რომ ჩვენ გავაგრძელოთ კონსულტაციები, მათ შორის არასამთავრობო ორგანიზაციებთან, რადგან გასულ წელს ჩვენ ვიყავით იმ სარჩელის ინიციატორები, რომელიც გულისხმობდა რეგულაციების შეცვლას ამ სფეროში. მე არ გამოვრიცხავ , რომ წავიდეთ მეორე წრეზე, რადგან სხვა გამოსავალს ეს გადაწყვეტილება არ იძლევა“, - განაცხადა ნანუაშვილმა.

დღეს პარლამენტის ბიუროს სხდომაზე ე.წ. ფარული მოსმენების კანონპროექტის განხილვა იგეგმება.

შეგახსენებთ, რომ წინა კვირას აღნიშნული საკონსტიტუციო ცვლილებათა პაკეტი ორი მოსმენით მიიღეს.

ანა მებურიშვილი