პოლიტიკა

არ დავუშვებთ რუსული მენტალიტეტის ჩინოვნიკის მატრიოშკას გაპრეზიდენტებას - ნუკრი ქანთარია

პარლამენტის სხდომათა დარბაზში დეპუტატებს შორის მწვავე ურთიერთბრალდებები და პოლიტიკური დებატები ისმოდა.

„ქართული ოცნებისა“ და „პატრიოტთა ალიანსის“ გაღიზიანება ,,ნაციონალური მოძრაობისა“ და ,,ევროპული საქართველოს“ წარმომადგენელთა იმ შეფასებებმა გამოიწვია, რომელიც არჩევნების პირველ ტურთან დაკავშირებით ისმოდა.

საპარლამენტო უმრავლესობის წევრები ამბობენ, რომ სალომე ზურაბიშვილი არჩევნების მეორე ტურში გაიმარჯვებს.

უმრავლესობის დეპუტატები ამბობენ, რომ გრიგოლ ვაშაძის პრეზიდენტად არჩევა რუსულ ინტერესებში შედის.

„ჩვენ არ დავუშვებთ რუსული მენტალიტეტის ჩინოვნიკის მატრიოშკას გაპრეზიდენტებას, რომლის შიგნით ზის სააკაშვილი, იმის შიგნით ზის მერაბიშვილი და სხვა მატრიოშკებში სხედან სხვადასხვა დამნაშავეები, სხვადასხვა კალიბრის,“-ამბობს ნუკრი ქანთარია.

საპარლამენტო უმცირესობის წევრები კი აცხადებენ, რომ ხელისუფლება არჩევნებში სალომე ზურაბიშვილის დამარცხებას მხოლოდ „რუსთავი 2“-ს ტყუილად აბრალებს.

საპარლამენტო ოპოზიციაში აცხადებენ, რომ ხელისუფლების დამარცხება მხოლოდ გაზრდილმა სიღარიბემ და შევარდნაძის ხელისუფლების დროინდელი კორუფციის დაბრუნებამ გამოიწვია.

"პატრიოტთა ალიანსის" დეპუტატი ემზარ კვიციანი კი ამბობს, რომ "ომი რუსეთმა დაიწყო, მაგრამ სააკაშვილის ხელით".

კვიციანი ამბობს, რომ მმართველმა გუნდმა ყველაფერი უნდა გააკეთოს,რომ არ გაიზარდოს ოპოზიციის მხარდამჭერთა რიცხვი.