პოლიტიკა

არ არსებობს აქტი, რომელიც გვავალდებულებს, რომ სხვა ქვეყნისთვის შეგვეტყობინებინა ცერცვაძის შესახებ - ზაქარია ქუცნაშვილი

არ არსებობს აქტი, რომელიც საქართველოს სხვა ქვეყნისთვის გია ცერცვაძის შესახებ ინფორმაციის გადაცემას დაავალდებულებდა, - ამის შესახებ საპარლამენტო უმრავლესობის წევრმა, ზაქარია ქუცნაშვილმა განაცხადა,

„საქართველოს ხელისუფლება არ დევნიდა ამ პიროვნებას. აბსურდი გადაიზარდა იმაში, რომ წითელ ცირკულარში იყო და რატომ არ გავაგებინეთ. პირდაპირ გეუბნებით, არ არსებობს აქტი, რომელიც გვავალდებულებს, რომ შეგვეტყობინებინა ცერცვაძის შესახებ სხვა ქვეყნისთვის. ესაა თითიდან გამოწოვილი პრობლემა იმისთვის, რომ „ნაციონალურმა მოძრაობამ“ მოღალატეები გვიძახოს“, - განაცხადა ქუცნაშვილმა.

ქუცნაშვილმა აღნიშნა, რომ მის ნათქვამს, გია ცერცვაძის დაკავების შესახებ, „ნაციონალური მოძრაობის“ წევრებმა არასწორი ინტერპრეტაცია მისცეს.

„ახალი წლის დაწყება დასრულდა „ნაციონალური მოძრაობის“ 4 ნაწილად დაშლით. მიუხედავად იმისა, რომ დაიშალნენ, აგრძელებენ მიზანმიმართული დემაგოგიის გავრცელებას ყველა კუთხით. ეს პოლიტიკური ძალა ცდილობს ხელისუფლებას დააბრალოს ის, რაც საერთოდ არ ეხება და არ შედის ხელისუფლების კომპეტენციაში. იგივე ცერცვაძის თემის ირგვლივ მოხდა მათ მიერ ჩემი ნათქვამის დამახინჯება. სამჯერ დადევნებული ჟურნალისტი მეკითხება, ვიცნობ თუ არა ცერცვაძის ქეისს, და ვპასუხობ, რომ არ ვიცნობ. მაინც მაცივდება, რომ ვუპასუხო, ამ დროს კი პასუხი სულ სხვა კონტექსტში გავეცი, თუმცა რა ინტერპრეტაციით გავიდა, ყველამ კარგად ნახა. ეს იყო ფაქტების გამყალბებელი ჟურნალისტი. ვეუბნები, არ ვიცნობ ფაქტებს და მთხოვს მის შეფასებას. ესაა „ნაციონალური მოძრაობის“ პროვოკაცია. მე ზოგადად ვახსენე, რომ მკვლელს ეროვნება არ აქვს და არა ცერცვაძის შემთხვევაში, რაზეც განვუმარტე, რომ აღნიშნულზე კომენტარს ვერ გავაკეთებდი. როგორ შეიძლება საქართველოს მთავრობას პასუხი მოსთხოვო უკრაინის მთავრობის ქმედებაზე“,– განაცხადა ზაქარია ქუცნაშვილმა პრესკონფერენციაზე.

შეგახსენებთ, რომ 2017 წლის 15 იანვარს 48 წლის გია ცერცვაძე უკრაინის სამართალდამცავებმა დააკავეს. 17 იანვარს კიევის სასამართლომ 40-დღიანი წინასწარი პატიმრობა შეუფარდა. ცერცვაძეს ინტერპოლი რუსეთის მოთხოვნის საფუძველზე ეძებდა. როგორც საპარლამენტო უმცირესობის წევრები ამბობენ, ცერცვაძის შესახებ მონაცემები რუსეთმა საქართველოსგან მიიღო.

ანა მებურიშვილი