სამართალი

აქიმიძე და დვალი მთავარი პროკურორისგან პასუხს მოითხოვენ

მაქსიმალური 14-დღიანი ვადის გასვლის მიუხედავად, პროკურატურას ჯარჯი აქიმიძისა და დავით დვალის განცხადებაზე რეაგირება დღემდე არ მოუხდენია. ამის შესახებ ინფორმაციას თავად აქიმიძე და დვალი ავრცელებენ.

მათივე ინფორმაციით, ტელეკომპანია "რუსთავი 2"-ის დამფუძნებლების მიერ პირველი ოფიციალური განცხადება პროკურატურაში 2017 წლის 6 აპრილს გაიგზავნა. დადგენილ ვადებში კი, პროკურატურისგან პასუხის მიუღებლობა არის უპრეცედენტო ფაქტი.

"რუსთავი 2"-ის დამფუძნებლებმა 29 აპრილს ხელმეორედ მიმართეს პროკურატურას. აქიმიძე და დვალი ახლა უკვე საქართველოს მთავარ პროკურორს, ირაკლი შოთაძეს სთხოვენ პასუხს:

„იძულებული ვართ, მოგმართოთ თხოვნით, რათა უზრუნველყოთ დაზარალებულად ცნობის შესახებ დადგენილების ჩვენთვის გადმოცემა; ასევე გთხოვთ, დაავალოთ საქმის მწარმოებელ გამომძიებელს წერილობით გვაცნობოს, თუ რა ეტაპზეა ამჟამად გამოძიება ჩვენ მიმართ ჩადენილი სისხლის სამართლის დანაშაულის საქმეზე",-ნათქვამია აქიმიძისა და დვალის განცხადებაში.

სამაუწყებლო კომპანია "რუსთავი 2"-ის დამფუძნებლებისათვის წილების იძულებით წართმევის ფაქტზე გამოძიება 2012 წლის ნოემბრიდან მიმდინარეობს.