პოლიტიკა

აქ თარეშობს სუს-ი და იღებს კადრებს, გარეთ ვინ ესწრება აქციას - ხათუნა სამნიძე

საკრებულოში სხდომის დაწყებამდე ბიუროს სხდომა მიმდინარეობს.

ფრაქცია „რესპუბლიკელების“ წევრის, ხათუნა სამნიძის განცხადებით, ოპოზიცია რამდენიმე მოთხოვნას დააყენებს, კერძოდ, რატომ დაიხურა სხდომა და ვისი ბრძანებით არ უშვებენ პარლამენტარებსა და მოქალაქეებს.

სამნიძის ინფორმაციით, საკრებულოში სუს-ის თანამშრომლები იმყოფებიან, რომლებიც საკრებულოს გარეთ მიმდინარე „ნაციონალური მოძრაობის“ აქციის მონაწილეებს ფოტოებს უღებენ.

„ჩვენი პირველი მოთხოვნა იქნება, რის საფუძველზე დახურა სხდომა ალიბეგაშვილმა, რომლის არავითარი ლეგიტიმური უფლება არ ჰქონდა, და ვისი ბრძანებით მოხდა ის, რაც ხდება საკრებულოს შენობის გარეთ და შიგნითაც. მაგან თქვა, რომ პრესა დაშვებულია, თუმცა ვერ გვცემს პასუხს, სუს-ი რატომაა შენობაში, პარლამენტარები და მოქალაქეები არ შემოუშვეს, სამაგიეროდ აქ თარეშობს სუს-ი და იღებს კადრებს, გარეთ ვინ ესწრება აქციას“, -უთხრა სამნიძემ „რუსთავი 2“-ს.

სამნიძემ დაამატა, რომ ოპოზიცია მოითხოვს ბიძინა ივანიშვილთან დაკავშირებული კომპანიებისთვის თაბორის მთასა და პუშკინის სკვერთან მდებარე ტერიტორიების გადაცემის დღის წესრიგიდან ამოღებას.

ანა მებურიშვილი