სამართალი

ანატოლი ბერძენიშვილი წარდგენილ ბრალს არ აღიარებს - ადვოკატი

ტერორიზმის დაფინანსების ბრალდებით დაკავებული ანატოლი ბერძენიშვილის ადვოკატის, მაია სირაძის განცხადებით, მისი დაცვის ქვეშ მყოფი წარდგენილ ბრალს არ აღიარებს.

როგორც ადვოკატმა ჟურნალისტებს გუშინ, სახელმწიფო უსაფრთხოების სამსახურის დატოვების შემდეგ განუცხადა, უცნობია საქმის მასალები და არ ფლობს ინფორმაციას იმასთან დაკავშირებით, თუ რა კონკრეტული მტკიცებულებები გააჩნია ბრალდების მხარეს.

„მას ბრალი ოფიციალურად უკვე წარედგინა, თუმცა არ აღიარებს. თვითონაც გაურკვევლობაშია, თუ რატომ დააკავეს, რადგან მას არანაირი კავშირი არ ჰქონია ამ საქმეში ბრალდებულ სხვა პირებთან და მისი საქმიანობაც დაკავშირებულია ქველმოქმედებასთან, ტაძრების მშენებლობასთან, რისი გადამოწმებაც შესაძლებელია. ჯერჯერობით საქმის მასალები არ გადმომცემია და არ ვიცი, კონკრეტულად რა მტკიცებულებები გააჩნია უსაფრთხოების სამსახურს“, - განაცხადა მაია სირაძემ.

ადვოკატი გამოეხმაურა ბერძენიშვილის სახაზინო ადვოკატის, ელდარ გვალიას განცხადებას იმასთან დაკავშირებით, რომ ბრალდებულს ურთიერთობა ჰქონდა მაჩალიკაშვილებთან, ასევე, ბერი გაბრიელ სალოსის ქუჩაზე სპეცოპერაციის შედეგად გარდაცვლილ პირებთან. სირაძის განცხადებით, ეს ინფორმაცია სიმართლეს არ შეესაბამება.