პოლიტიკა

ანაკლიის პროექტის გადახედვა არ მიგულისხმია, უნდა გადავხედოთ საქართველოს, როგორც ლოჯისტიკური ჰაბისა და კორიდორის სტრატეგიას - გიორგი ქობულია

ეკონომიკისა და მდგრადი განვითარების მინისტრობის კანდიდატმა, გიორგი ქობულიამ ანაკლიის პორტის პროექტთან დაკავშირებით თავისი განცხადება განმარტა და აღნიშნა, რომ მისი გადახედვა არ უგულისხმია. საპარლამენტო კომიტეტის შემდეგ ჟურნალისტებთან საუბრისას ქობულიამ ახსნა, რომ გადასახედია არა პორტის პროექტი, არამედ საქართვერლოს, როგორც ლოჯისტიკური ჰაბისა და კორიდორის სტრატეგია.

„ანაკლიის პროექტის გადახედვა არ მიგულისხმია. მე ვიგულისხმე, რომ ჩვენ უნდა გადავხედოთ საქართველოს, როგორც ლოჯისტიკური ჰაბისა და კორიდორის სტრატეგიას, საიდან მოდის ეს – საქართველოს ერთ-ერთი ძალიან მნიშვნელოვანი უპირატესობა ქვეყნის გეოგრაფიული მდებარეობაა“, – განაცხადა ქობულიამ.

მისი თქმით, წლებია ამაზე საუბარი მიმდინარეობს და ქვეყანამ აღნიშნული გეოგრაფიული მდებარეობა გამოიყენოს და ტვირთების გადაზიდვები განავითაროს.

„ჯერჯერობით ეს ხდება, მაგრამ აქ ჩვენ დამატებით ძალიან დიდ პოტენციალს ვხედავთ. ამასთან დაკავშირებით, თვითონ ამ სტრატეგიას უნდა გადავხედოთ, თუ როგორ გვინდა, განვავითაროთ და ავითვისოთ პოტენციალი, რომელიც საქართველოს გეოგრაფიულ მდებარეობას აქვს. ეს კომპლექსური ამოცანაა, რომელიც გადახედილი იქნება – პორტები, რკინიგზა, ავტოტრანსპორტი და ამ კომპონენტების ურთიერთზემოქმედებისთვალსაზრისით“, - თქვა ქობულიამ.