პოლიტიკა

ანა ნაცვლიშვილი ამ დროისთვის ვერ აკონკრეტებს, დაესწრება თუ არა გიორგი მარგველაშვილი სალომე ზურაბიშვილის ინაუგურაციას

მოქმედი პრეზიდენტის საპარლამენტო მდივანს ანა ნაცვლიშვილს ჯერ არ დაუკონკრეტებია, დაესწრება თუ არა გიორგი მარგველაშვილ სალომე ზურაბიშვილის ინაუგურაციას.

ნაცვლიშვილის განმარტებით, პროტოკოლის სამსახური მუშაობს გარკვეულ საკითხებზე, რომლის დასრულების შემდეგ ზუსტად გაირკვევა, ჩავა თუ არა გიორგი მარგველაშვილი თელავში.

„ეს მნიშვნელოვანი პრეცედენტია, რაზეც უნდა დაშენდეს ძალაუფლებების ცივილიზებულად გადაბარების ტრადიცია და კულტურა. რაც შეეხება იმას, დაესწრება თუ არა ახლად არჩეული პრეზიდენტის ინაუგურაციას, მან მოწვევა მიიღო.

პროტოკოლის სამსახური მუშაობს კონკრეტულ საკითხებზე და როცა ეს დეტალები გადაწყდება, ამის შემდეგ გახდება ცნობილი პრეზიდენტის დასწრებისა და კონკრეტული ფუნქციის შესახებ.

როგორც ხედავთ, პრეზიდენტი ისევე, როგორც გასული ხუთი წლის განმავლობაში, მოწოდებულია, იმოქმედოს არა პირადი გემოვნებით, არამედ სახელმწიფო ინტერესებიდან გამომდინარე. პროტოკოლებს შორის მიმდინარე მუშაობა, იმედია, იქნება კონსტრუქციული და სასარგებლო გადაწყვეტილებამდე მივლენ.

იმედია, ორივე მხარე სასარგებლო ინფორმაციამდე მივა და ამის შემდეგ იქნება ცნობილი გადაწყვეტილება. პრეზიდენტის განწყობა მუდმივად იყო და ახლაც არის, რომ ისე მოიქცეს, როგორც სახელმწიფოს მეთაურის მაღალი პასუხისმგებლობა ავალდებულებს, თუმცა კონკრეტულ დეტალებზე მიმდინარეობს მსჯელობა და მნიშვნელოვანია, რომ ამ დეტალებზე კონსტრუქციული შეთანხმება მოხდეს“, – განაცხადა ნაცვლიშვილმა.