პოლიტიკა

ანა დოლიძემ შეურაცხყოფა მიაყენა თითოეულ მოსამართლეს, მისი არაეთიკური განცხადებები მთელ სისტემას ზიანს აყენებს - რევაზ ნადარაია

იუსტიციის უმაღლესი საბჭოს მოქმედი წევრისა და უვადო მოსამართლეობის კანდიდატის, რევაზ ნადარაიას განცხადებით, გასაუბრებაზე მან მოითხოვა იუსტიციის უმაღლესი საბჭოს არამოსამართლე წევრის, ანა დოლიძის აცილება მისი არაეთიკური განცხადებების გამო.

„ქალბატონი ანა დოლიძე მე ავიცილე მისი განცხადებიდან გამომდინარე, მან განაცხადა, რომ მოსამართლეები, რომლებიც გარკვეული პერიოდის განმავლობაში მუშაობდნენ სასამართლოში და იხილავდნენ სისხლის სამართლისა და ადმინისტრაციულ საქმეებს, არ უნდა დაინიშნონ სასამართლო სისტემაში, ანუ პირდაპირ გამოთქვა აზრი ამ კონკურსანტების მიმართ და მე ვფიქრობ, ჩემ მიმართ და ამ მოსამართლეების მიმართ ის ვერ იქნებოდა მიუკერძოებელი და მან არ უნდა მიიღოს მონაწილეობა ჩემს შეფასებასა და გასაუბრებაში. მან შეურაცხყოფა მიაყენა თითოეულ მოსამართლეს, მისი არაეთიკური და პოლიტიკური განცხადებები ზიანს აყენებს მთელს სისტემას“, - უთხრა ნადარაიმ ჟურნალისტებს.

დოლიძის აცილება ასევე მოითხოვა მოსამართლე მერაბ ლომიძემ.

გასაუბრებიდან დოლიძის გასვლა გუშინ კიდევ ერთმა კანდიდატმა, მოსამართლე გიორგი გოგინაშვილმა მოითხოვა.

გუშინ ანა დოლიძემ განაცხადა, რომ „ზურაბ ადეიშვილის ნარჩენები“ სასამართლო ხელისუფლებაში კონტროლისა და ძალაუფლების შენარჩუნებას ცდილობენ.