პოლიტიკა

ანა დოლიძე ცდილობს, პოლიტიკური განცხადებით შეურაცხყოს კოლეგები - გიორგი მიქაუტაძე

იუსტიციის უმაღლესი საბჭოს თავმჯდომარე, გიორგი მიქაუტაძე გამოეხმაურა იუსტიციის უმაღლეს საბჭოში პრეზიდენტის მიერ წარდგენილი არამოსამართლე წევრის, ანა დოლიძის განცხადებას. დოლიძის მტკიცებით, „ზურაბ ადეიშვილის ნარჩენები“ სასამართლო ხელისუფლებაში კონტროლისა და ძალაუფლების შენარჩუნებას ცდილობენ.

მიქაუტაძის შეფასებით, დოლიძე ცდილობს, კოლეგები შეურაცხყოს და საბჭოს მუშაობაში პოლიტიკა შეიტანოს.

„თავის დროზე ძალიან პროგრესული გადაწყვეტილება იყო მიღებული და საკმაოდ კარგი რეფორმა გატარდა, როდესაც პოლიტიკოსებისგან გათავისუფლდა იუსტიციის საბჭო და პარლამენტის წევრები გაიყვანეს საბჭოდან. დღეს არის გარკვეული კრიტერიუმები, რომლის მიხედვითაც საბჭოში არამოსამართლე წევრები ინიშნებიან და ირჩევიან პარლამენტის მხრიდან. პრეზიდენტის დანიშნული წევრი არ აკმაყოფილებს ამ კრიტერიუმებს და ყველანაირად ცდილობს, რომ პოლიტიკური განცხადებით შეურაცხყოს კოლეგები. მთავარი კრიტერიუმია, რომ საბჭოს წევრი პოლიტიკისგან იყოს თავისუფალი. ნომერ პირველი მოთხოვნაა, რომ არ უნდა იყოს პოლიტიკური ფიგურა. ჩვენ მივიღეთ პოლიტიკურად ძალიან აქტიური პირი საბჭოში და შედეგებიც სახეზეა“, -თქვა მიქაუტაძემ.