პოლიტიკა

ან თავისუფლება სად არის, ან ღირსება სად არის, ან განვითარება - ნიკა მელია ბილბორდებზე

„ერთიანი ნაციონალური მოძრაობის“ პოლიტიკური საბჭოს თავმჯდომარის, ნიკა მელიას განცხადებით, წინასაარჩევნო ბილბორდებზე სალომე ზურაბიშვილის მაგივრად ბიძინა ივანიშვილის ფოტოს გამოჩენა რეიტინგის აწევას ემსახურება. მელიას თქმით, ივანიშვილს ჰგონია, რომ საზოგადოების ჭარბი ნდობით სარგებლობს.

„როგორი ადამიანები გააკრეს საარჩევნო ბანერებზე, ადამიანები, ვინც ისტორიულ ნიშნულამდე ლარი გააუფასურა, საწვავი ისტორიულ ნიშნულამდე გააძვირა; ვის პირობებშიც გაჭირვებული კიდევ უფრო გაჭირვებულად გრძნობს თავს და ღარიბი გაღატაკდა, ვის პირობებშიც 800 ათასი ქართველი ქვეყნიდან გავიდა, მილიონამდე სოციალურად დაუცველია, 150 ათასი ბავშვი შიმშილობს და უკეთესი ხვალინდელი დღის პერსპექტივაც დაიკარგა - და ეს ყველაფერი შექმნა ივანიშვილმა. მას მიაჩნია, რომ კვლავ აქვს ის ჭარბი ნდობა საზოგადოებაში და უთხრა შტაბის წევრებს, რომ აუცილებლად გააკარით ჩემი ბილბორდები და მიაწერეთ - თავისუფლება, განვითარება და ღირსება. ან თავისუფლება სად არის, ან ღირსება სად არის, ან განვითარება?!“ - განაცხადა მელიამ.

დღეს დილიდან ახალი წინასაარჩევნო ბილბორდები გაჩნდა. ზოგიერთებზე სალომე ზურაბიშვილის მაგივრად „ქართული ოცნების“ თავმჯდომარის, ბიძინა ივანიშვილისა და პარლამენტის თავმჯდომარის, ირაკლი კობახიძის ფოტოებია განთავსებული.