პოლიტიკა

ამის დასასრული იქნება ძალიან ღრმა, მძიმე კრიზისი, რომელიც პრობლემას შეუქმნის ქალაქის ეკონომიკას - ვასილ ურუშაძე ტაქსის მომსახურების გაძვირებაზე

HUB Georgia-ის აღმასრულებელი დირექტორის, ვასილ ურუშაძის განცხადებით, ტაქსის მომსახურების გაძვირება თბილისის ეკონომიკაში ღრმა და მძიმე კრიზისს გამოიწვევს.

ურუშაძის თქმით, ქალაქში რომ ნაკლებმა ტაქსმა და კერძო ავტომობილმა იმოძრაოს, საზოგადოებრივი ტრანსპორტი უნდა განვითარდეს.

„ნაცვლად იმისა, რომ ჩვენ სატაქსომოტორო სერვისის რეფორმის შედეგად მიგვეღო უფრო გაუმჯობესებული სერვისი, გაუმჯობესებული საგზაო მოძრაობა და გაუმჯობესებული ეკოლოგიური მდგომარეობა, როგორც ჩანს, მივიღებთ უფრო მეტად გაძვირებულ სერვისს და მეტს არაფერს. ამაზე თბილისის მერმაც აღნიშნა, რომელსაც, როგორც ჩანს, აწუხებს ტაქსის სერვისის ხელმისაწვდომობა და სურს, ეს ხელმისაწვდომობა გაართულოს და უფრო მიუწვდომელი გახადოს მოქალაქეებისთვის.

იმისთვის, რომ ქალაქში ნაკლებმა ტაქსმა და კერძო ავტომობილმა იმოძრაოს, საჭიროა საზოგადოებრივი ტრანსპორტის განვითარება, რაც ქალაქში მოძრაობასაც განტვირთავს და ტაქსით მომსახურების საჭიროებასაც შეამცირებს. ამ მიდგომებითა და შეფერხებების შექმნით პრობლემა ვერ მოგვარდება. სატრანსპორტო კოლაფსი ქალაქში უკვე არის. პიკის საათებში ტაქსები ძირითადად, მიუწვდომლები არიან. ეს არის კოლაფსის პირველი ფაზა და თუ ასე გაგრძელდება, არ გადაიდგმება რეალური ნაბიჯები, ისევ ბიუროკრატიული გზით წავალთ, დამატებით ბარიერებს შევქმნით, ამის დასასრული იქნება ძალიან ღრმა, მძიმე კრიზისი, რომელიც არა მარტო მოქალაქეების სიცოცხლესა და ჯანმრთელობას, მათ გადაადგილებას შეუქმნის პრობლემას, არამედ პრობლემას შეუქმნის ქალაქის ეკონომიკას",- განაცხადა ურუშაძემ.