სამართალი

ამიხსნეს, რომ საქმე საბოტაჟის მუხლით იყო აღძრული და უცხოეთიდან დაფინანსების შესახებ კანონიც ახსენეს - მარიამ ბაჯელიძე

სამოქალაქო აქტივისტი მარიამ ბაჯელიძე აცხადებს, რომ მის საცხოვრებელ ბინაში ჩატარებული ჩხრეკა ზედაპირული იყო და პროკურატურის წარმომადგენლების მთავარი მიზანი ტელეფონის ამოღება იყო.

„მათი მიზანი იყო ტელეფონი ამოეღოთ. პირდაპირ ეთერში რომ გავედი გაღიზიანდნენ და წამართვეს. მობილური როდესაც წაიღეს, ამიხსნეს, რომ მოსულები არიან საბოტაჟის მუხლით დაწყებულ გამოძიებაზე, ასევე უცხოეთიდან დაფინანსების შესახებ კანონი მიხსენეს. მეუბნებოდნენ, რომ ეძებდნენ რაიმე ტიპის ელექტრონულ ნივთს, ასევე კანონსაწინააღმდეგო ნივთიერებას, ან ნივთს. ჩხრეკის პროცესი ზედაპირულად ჩაატარეს. იცოდნენ, რომ ტელეფონი იყო მთავარი, რაც უნდა ამოეღოთ. გადაწყვიტეს, რომ ლეპტოპიც წაეღოთ“,- აღნიშნა ბაჯელიძემ.

ცნობისთვის, მარიამ ბაჯელიძის სახლში ჩხრეკა გამთენიისას ჩატარდა და უკვე დასრულებულია.