პოლიტიკა

ამერიკელ კონგრესმენებთან დეტალურად ვისაუბრეთ „რუსთავი 2“-ის შესახებ - დავით ბაქრაძე

საპარლამენტო უმცირესობის წევრები ამერიკელ კონგრესმენთა დელეგაციას შეხვდნენ. საპარლამენტო ფრაქცია „ევროპული საქართველოს“ წევრის, დავით ბაქრაძის განცხადებით, ამერიკელ პარტნიორებს კითხვები გაუჩნდათ რამდენიმე საკითხზე, მათ შორის „რუსთავი 2“-ის საქმეზეც.

„რა თქმა უნდა, აშშ მხარს უჭერს საქართველოს, ქვეყნის თავისუფლებას, მაგრამ მათ, როგორც ჩვენს მთავარ პარტნიორებს, აქვთ სერიოზული კითხვის ნიშნები იმ საკითხებზე, რაც ჩვენც გვაღელვებს, კერძოდ, ქართულ დემოკრატიასთან მიმართებაში. ჩვენ შორის იყო ძალიან დეტალური საუბარი „რუსთავი 2“-ის საქმეზე“, - განაცხადა ბაქრაძემ შეხვედრის დასრულების შემდეგ.

„ევროპული საქართველოს“ წევრის თქმით, მოსახლეობას უნდა ესმოდეს, რომ „ესაა მეგობრებისგან მომავალი კრიტიკა იმისთვის, რომ საქართველო იყოს უკეთესი“.

შეგახსენებთ, რომ საქართველოს პარლამენტში აშშ-ის კონგრესის დელეგაციას მასპინძლობენ.

საკანონმდებლო ორგანოს თავმჯდომარემ, ირაკლი კობახიძემ ბრიფინგზე განაცხადა, რომ ამერიკელ კონგრესმენებთან თანამშრომლობის ერთ-ერთი მთავარი მიზანი, საქართველოს პარლამენტის ეფექტურობის გაზრდაა.

ანა მებურიშვილი