პოლიტიკა

ამერიკაში დარჩენის განზრახვა არასოდეს მქონია და არც ახლა ვაპირებ - მიხეილ სააკაშვილი

„ამერიკაში დარჩენის განზრახვა არასოდეს მქონია და არც ახლა ვაპირებ“, - განუცხადა საქართველოს ყოფილმა პრეზიდენტმა და ოდესის ყოფილმა გუბერნატორმა მიხეილ სააკაშვილმა „ამერიკის ხმის“ ქართულ სამსახურს. მისი თქმით, მას მწვანე ბარათის აღების შესაძლებლობა ჰქონდა, თუმცა არ გამოუყენებია.

„შემეძლო მისი აღება, შემომთავაზეს, მაგრამ მე არ მინდოდა. ასვე მაქვს ტურისტული ვიზაც. ამერიკაში დარჩენის განზრახვა არასოდეს მქონია და არც ახლა ვაპირებ. მე მიყვარს ეს ქვეყანა და აქ თავს თითქმის სახლში ვგრძნობ, მაგრამ ჩემი სახლი საქართველო და უკრაინაა“, - განუცხადა სააკაშვილმა „ამერიკის ხმას“.

ოდესის ყოფილი გუბერნატორის თქმით, ის აშშ-ში სამუშაო ვიზით იმყოფება, რომელსაც ვადა 2018 წელს ეწურება.

სააკაშვილის განცხადებით, სურვილის შემთხვევაში ის ჰოლანდიის მოქალაქეობას აიღებდა.

„ჰოლანდიის მოქალაქეობა რომ მნდომოდა, დიდი ხნის წინ ავიღებდი. ჩემი ცოლი ახლა საქართველოს მოქალაქეა. ჩემი შვილები ქართველები არიან. ფორმალურად არა, მაგრამ რეალურად მე ქართველი ვარ“, - თქვა სააკაშვილმა.

შეგახსენებთ, მიხეილ სააკაშვილს უკრაინის მოქალაქეობა 26 ივლისს ჩამოართვეს. როგორც უკრაინის პრეზიდენტის ადმინისტრაციამ „ინტერფაქს-უკრაინას“ განუცხადა, ამის მიზეზი გახდა მოქალაქეობის მისაღებად საჭირო დოკუმენტების შევსებისას არასწორი ინფორმაციის მიწოდება. სააკაშვილი ამჟამად აშშ-ში იმყოფება.

ანა მებურიშვილი