პოლიტიკა

ამდენი გადაუწყვეტელი ამომრჩეველი საქართველოში ჯერ არ გვინახავს - NDI-ის საქართველოს ოფისის დირექტორი

ეროვნულ-დემოკრატიული ინსტიტუტის (NDI) საქართველოს ოფისის დირექტორი, ლორა ტორნტონი გამოეხმაურა კვლევის შედეგებს, რომლის თანახმად, გამოკითხულთა 74%-ს არ აქვს გადაწყვეტილი, ვის მისცემს ხმას, ხვალ რომ საპრეზიდენტო არჩევნები ჩატარდეს.

„ამდენი გადაუწყვეტელი ამომრჩეველი საქართველოში ჯერ არ გვინახავს. ეს შეიძლება კანდიდატების სრული სიის არარსებობას ან პრეზიდენტის უფლებამოსილების შემცირებას უკავშირდებოდეს.

აზრთა სხვადასხვაობაა კანდიდატებთან მიმართებით. თუ პრეზიდენტი მიიღებს მონაწილეობას არჩევნებში, პირველ ტურში საკმაოდ დიდი სხვაობა იქნება, თუმცა მეორე ტურის დანიშვნის შემთხვევაში „ქართული ოცნების“ კანდიდატისა და მარგველაშვილის მაჩვენებლები პროცენტულად ახლოს იქნება“, -თქვა ტორნტონმა.

გადაუწყვეტელი 74%-ის გარდა გამოკითხულთა 20%-მა განაცხადა, რომ გადაწყვეტილი აქვს, ვის მისცემს ხმას საპრეზიდენტო არჩევნებზე, ხოლო 5%-მა უპასუხა, რომ არ იცის, 1%-მა კი პასუხის გაცემაზე უარი თქვა.