პოლიტიკა

ამბოხებული დეპუტატები რას იტყვიან, ნაკლებად მნიშვნელოვანია - დიმიტრი ცქიტიშვილი

საპარლამნეტო უმრავლესობის წევრის, დიმიტრი ცქიტიშვილის ინფორმაციით, მოსამართლეთა ათკაციანი სია შესაძლოა, არ დაკორექტირდეს.

დეპუტატის განცხადებით, სიის შეცვლა არ შეცვლის საკითხთან დაკავშირებით გადაწყვეტილებას , რომელსაც პარლამენტი მიიღებს, მაგრამ თუ იგივე დარჩება, ამ საკითხზე ამბოხებული დეპუტატები რას იტყვიან, გუნდის დანარჩენი წევრებისთვის მნიშვნელოვანი არ არის.

,,შემადგენლობა პროცედურულად შეიძლება დარჩეს და ამას ვუყაროთ კენჭი, ან ახალი სია წარმოადგინონ, ეს ცალკე საკითხია. მე ვფიქრობ, რომ ძალიან სწორი პროცესი წარიმართა პარლამენტში. ეს არის საპარლამენტო პროცესი და პარლამენტმა უნდა მიიღოს გადაწყვეტილება. პარლამენტი თავისი პასუხისმგებლობის ფარგლებში მიიღებს სწორ გადაწყვეტილებას. ამბოხებული დეპუტატები რას იტყვიან, ნაკლებად მნიშვნელოვანია“,-განაცხადა ცქიტიშვილმა.

დაპირისპირება მმართველ გუნდში უზენაეს სასამართლოში გასამწესებელ მოსამართლეთა გამო დეკემბრის ბოლოს დაიწყო. ეკა ბესელიამ იურიდიულ საკითხთა კომიტეტის თავმჯდომარის თანამდებობა დატოვა. კომიტეტის თავმჯდომარის პირველ მოადგილედ ბესელიას გუნდის წევრი გედევან ფოფხაძე აირჩიეს, თუმცა უმრავლესობის გადაწყვეტილებით ფოფხაძის არჩევისას რეგლამენტი დაირღვა, რის გამოც ის ამ თანამდებობას ვერ დაიკავებს.

ბესელიას წინააღმდეგ ე.წ. ახლებს მხარს პარტიის თავმჯდომარე ბიძინა ივანიშვილიც უჭერს, გუშინ გავრცელებულ განცხადებაში ივანიშვილმა ბესელია და ფოფხაძე მკაცრად გააკრიტიკა. მმართველი პარტიის სხდომაზე შესაძლოა ბესელია და ფოფხაძე მმართველი გუნდიდან გარიცხონ.