პოლიტიკა

ამ თავდასხმას ხელმძღვანელობდა ენძელ კოიანის, „ქართული ოცნების“ მაჟორიტარი დეპუტატის ძმა არტურ მკოიანი - გიორგი ვაშაძე

„აგონიაში მყოფი „ქართული ოცნება“ პირდაპირ პროვოკაციებსა და ძალადობაზე მიდის“, - ასე გამოეხმაურა გაერთიანებული ოპოზიციის საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელი გიორგი ვაშაძე ახალქალაქში მომხდარ ფიზიკურ დაპირისპირებას.

მისი ინფორმაციით, 20-მდე პირი ფიზიკურად გაუსწორდა საარჩევნო შტაბის ხელმძღვანელ აშოტ რაისიანსა და საოლქო კომისიის წარმომადგენლებს - აბრამ აბრაჰამიანს, ტიგრან აბრაჰამიანსა და მიშა აღაბაბიანს. ვაშაძის თქმით, მათ სასტიკად გაუსწორდნენ და სცემეს ხელკეტებით.

ვაშაძის თქმით, ახალქალაქის ოპოზიციას შტაბის წევრებს „ ქართული ოცნების“ მაჟორიტარი დეპუტატის ძმის ხელმძღვანელობით დაესხნენ თავს.

„ამ თავდასხმას ხელმძღვანელობდა ენძელ კოიანის, „ქართული ოცნების“ მაჟორიტარი დეპუტატის, ძმა არტურ მკოიანი. ეს პიროვნება იდენტიფიცირებულია და ასევე მიმდინარეობს ჩვენ მხრიდან სხვა თავდამსხმელების იდენტიფიცირება. ჩვენი ინფორმაციით, 20-მდე ადამიანი დაესხა ჩვენს შტაბს. ხელკეტებით იყვნენ შეიარაღებულები და სასტიკად არიან ნაცემები. ასევე, ჩვენი ინფორმაციით აბრაჰამ აბრაამიანი შეიძლება გადმოიყვანონ თბილისში იმდენად მძიმე ტრამვები აქვს“, -თქვა ვაშაძემ და მიმართა ხელისუფლებას, შეწყვიტოს ძალადობა.

ვაშაძემ მოუწოდა შტაბის წევრებსა და მხარდამჭერებს, რომ მშვიდობიანად უპასუხონ ძალადობასა და პროვოკაციას.