პოლიტიკა

ამ საქმეს პირად კონტროლზე ავიყვან და ვიბრძოლებ საქართველოში აბსოლუტური მედიათავისუფლებისთვის - ევროპარლამენტარი „იბერია ტვ“-ზე

ევროპარლამენტარი ანდრეის მამიკინსი ტელეკომპანია „იბერიას“ გარშემო განვითარებულ მოვლენებს გამოეხმაურა. მისი თქმით, ის აღნიშნულ საკითხს პირდა კონტროლზე აიყვანს.

„უპირველეს ყოვლისა, ერთი რამ მინდა გავიხსენო. როდესაც ლატვიის ადგილობრივ ტელევიზიაში ჟურნალისტი ვიყავი, ბევრი მეგობარი მყავდა „იბერია ტვ“-ში. მახსოვს, რომ მაშინაც არსებობდა სირთულეები, როდესაც წინა მთავრობის დროს „იბერიაში“ შეიჭრნენ, თქვენი სტუდია გაანადგურეს და რამდენიმე ჟურნალისტი დააპატიმრეს კიდევაც.

მე დღემდე ეს ძალიან კარგად მახსოვს და დღეს, როცა მიმდინარე ანგარიშს ვამზადებ საქართველო-ევროკავშირის ასოცირების შეთანხმებაზე, მინდა, ხაზი გავუსვა ერთ უმნიშვნელოვანეს ფაქტორს - შეიძლება, პოლიტიკოსებს ჟურნალისტები ძალიანაც არ მოგვწონდეს, ეს ჩემს ტყავზე გამოვცადე აქ ევროპარლამენტში, მაგრამ სიტყვისა და გამოხატვის თავისუფლება უმნიშვნელოვანესია და ჩვენ მის სადარაჯოზე უნდა ვიდგეთ. ყველაფერი უნდა ვიღონოთ, რომ მედიის თავისუფლება არავინ არ ხელყოს.

ჟურნალისტები უნდა იყვნენ თავისუფალი და არა პოლიტიკური კონტროლის ქვეშ. ეს დაუშვებელია. და მე, როგორც საგარეო ურთიერთობათა კომიტეტისთვის საქართველოს საკითხზე მომხსენებელი, პირობას გაძლევთ, რომ ამ საქმეს პირად კონტროლზე ავიყვან და ვიბრძოლებ საქართველოში აბსოლუტური მედიათავისუფლებისთვის“, - განაცხადა მამიკინსმა.

პარასკევს ტელეკომპანიის ჟურნალისტებმა საგანგებო განცხადება გაავრცელეს, რომელშიც აღნიშნულია, რომ ხელისუფლებამ „იბერიას“ გადაუკეტა დაფინანსების მთავარი წყარო. კერძოდ, კომპანია ,,ომეგა ჯგუფი“, რომლის შემადგენლობაშიც შედის ტელეკომპანია ,,იბერია“, პარალიზებულია. ტელეკომპანიის განცხადებით, ხელისუფლებამ წარმოება მიზანმიმართულად გააჩერა.