საზოგადოება

ამ დროისთვის ე.წ. ღორის გრიპით გარდაცვალების 8 შემთხვევა დაფიქსირდა

დაავადებათა კონტროლის ეროვნული ცენტრის გენერალური დირექტორის, ამირან გამყრელიძის ინფორმაციით, ამ დროისთვის ღორის გრიპით გარდაცვალების 8 შემთხვევა დაფიქსირდა.

გამყრელიძის თქმით, რისკ-ჯგუფში შედიან ორსული ქალები, ამიტომ აუცილებელია, მათ მიმართონ ოჯახის ექიმს ან მეან-გინეკოლოგს.

„დღევანდელი მონაცემებით გვაქვს 8 ლაბორატორიულად დადასტურებული, სამწუხაროდ, სიკვდილიანობის შემთხვევა, სადაც დადასტურებულია, რომ ერთ-ერთი მიზეზი გახლდათ გრიპის ვირუსის არსებობა, ყველა შემთხვევაში იყო H1N1.

ჩვენი ერთ-ერთი მთავარი რეკომენდაციაა, რომ გრიპის სეზონზე განსაკუთრებულად ფრთხილად უნდა იყვნენ ადამიანები, ვისაც აქვს ქრონიკული დაავადებები. პირველივე სიმპტომების შემთხვევაში, განსაკუთრებით დღეს ეს შტამი, რომელიც ცირკულირებს, ძალიან ვირულენტურია ორსული ქალბატონების მიმართ. ამიტომ აუცილებელია, რომ მათ მიმართონ თავის მეან-გინეკოლოგს და ოჯახის ექიმს და იმოქმედონ მათი დანიშნულების მიხედვით“, - განაცხადა გამყრელიძემ.

მისივე განცხადებით, ჯერჯერობით ქვეყანაში ეპიდემიის საფრთხე არ არსებობს. გამყრელიძის თქმით, დღეს არსებული მონაცემებით, ვირუსი 100 ათას ადამიანზე მხოლოდ 277 ადამიანს დაუდასტურდა, ეპიდემიის საფრთხე კი დგება მაშინ, როდესაც ინფიცირებულთა რაოდენობა 500-მდე გაიზრდება.

დაავადებათა ეროვნულ ცენტრში განაცხადეს, რომ გარდაცვლილ რვავე პაციენტს ქრონიკული დაავადებები ჰქონდა, რამაც ვირუსის გამწვავება გამოიწვია. გარდა ამისა, მათ სამედიცინო დაწესებულებებს დაგვიანებით მიმართეს.

H1N1-ით გარდაცვალების 8 შემთხვევიდან 4 აჭარაში დაფიქსირდა. აჭარის საზოგადოებრივი ჯანდაცვის ცენტრის ხელმძღვანელის, რუსუდან შავიშვილის ინფრომაციით, კლინიკებში ამჟამად მკურნალობას 130-მდე ადამიანი გადის და მათი უმეტესობა ბავშვია.