პოლიტიკა

ამ არჩევნებმა ისიც აჩვენა, რომ ფულით ყველაფერს ვერ იყიდი - ნატო-ს საპარლამენტო ასამბლეის პრეზიდენტი

ნატო-ს საპარლამენტო ასამბლეის ახალმა პრეზიდენტმა რასა იუკნევიჩენემ საქართველოს საპრეზიდენტო არჩევნების შეფასებისას განაცხადა, რომ არჩევნების შედეგებმა ცხადყო, რომ ფულით ყველაფერს ვერ იყიდი. მან ასევე ყურადღება გაამახვილა ადმინისტრაციული რესურსის გამოყენებასა და მმართველი გუნდის კრიტიკაზე არასამთავრობო სექტორის მიმართ.

იუკნევიჩენე არჩევნების პირველ ტურზე საქართველოში დამკვირვებლად იმყოფებოდა.

„ვამაყობ ქართველი ხალხით, რადგან დავინახე, რომ მათ აქვთ უზარმაზარი სურვილი, თავიანთი ქვეყანა სხვა ევროპულ სახელმწიფოებს შორის იყოს. როდესაც ისინი მოდიოდნენ უბნებზე, მივხვდი, რომ საქართველოს კარგი მომავალი აქვს. ასევე ვნახე, რომ დემოკრატია სხვადასხვაგვარად ესმით. ვნახე ხალხი, ვისაც სურს, დემოკრატიულ სახელმწიფოში იცხოვროს, სადაც თავისუფალი და სამართლიანი არჩევნები ტარდება. მეორე მხრივ, ვნახეთ როგორ იყენებდნენ დიდძალ ადმინისტრაციულ რესურს, როგორ ცდილობდნენ ენჯეოებზე თავდასხმას. მედია პოლარიზებულია და მის მიმართ პოლიტიკურ ჯგუფებს განსხვავებული პოზიცია აქვთ. ამ არჩევნებმა ისიც აჩვენა, რომ ფულით ყველაფერს ვერ იყიდი. არა მხოლოდ საქართველოში, არამედ სხვა ქვეყნებში, სადაც ვყოფილვარ. მინახავს, როგორ ცდილობენ დემოკრატიის გაგების შეცვლას, რაც იმას ნიშნავს, რომ თუ არჩევნებში ვიმარჯვებთ, ყველაფერს ჩვენ ვიღებთ. ეს არ არის დემოკრატია. ჩვენ ახლა ფინეთში ვართ და ევროპის ეს მხარე კარგი მაგალითია, გავიგოთ, რა და როგორ ხდება, რადგან მათაც გამოიარეს პოსტსაბჭოთა პერიოდი. ოპოზიციიდან არჩეული კანდიდატიც ხალხის მიერაა არჩეული და სწორედ ძალაუფლების გადანაწილებაშია დემოკრატია“,-განაცხადა რასა იუკნევიჩენემ.

ჰელსინკიში მიმდინარე „ევროპის სახალხო პარტიის“ კონგრესზე საქართველოს საპრეზიდენტო არჩევნების თემა აქტუალური აღმოჩნდა. საკუთარ გამოსვლაში IPP-ისპრეზიდენტმა გრიგოლ ვაშაძეს წარმატებები უსურვა. ფინეთის დედაქალაქში გრიგოლ ვაშაძის მხარდასაჭერად ერთმანეთს გიგი უგულავა და მიხეილ სააკაშვილი შეხვდნენ.