პოლიტიკა

ალეკო ელისაშვილმა კახა კალაძე საჯარო დებატებში მიიწვია

თბილისის მერობის დამოუკიდებელმა კანდიდატმა ალექსანდრე ელისაშვილმა, „ქართული ოცნების“ მერობის კანდიდატი კახა კალაძე სატელევიზიო დებატებში მიიწვია.

ამის შესახებ ელისაშვილმა ბრიფინგზე განაცხადა.

„ბოლო დღების, ბოლო პერიოდის განმავლობაში სხვადასხვა ტელევიზიებიდან, სხვადასხვა არხიდან, ჩემს შტაბს, ჩემს პრეს სპიკერს გვიკავშირდებოდნენ რედაქტორები, პროდიუსერები და პირველი კითხვა იყო მზად ვიყავი თუ არა, რომ „ქართული ოცნების“ მერობის კანდიდატთან კახი კალაძესთან მიმეღო დებატებში მონაწილეობა. ყოველჯერზე ჩვენ ვადასტურებდით მზაობას და ყოველთვის ეს შეთანხმება, რატომღაც იშლებოდა.

მე გადავწყვიტე ყოველგვარი შუამავლების, მიკიბ-მოკიბვის გარეშე, მივმართო „ქართული ოცნების“ შტაბს, ჩემს კონკურენტს „ქართული ოცნებიდან“, კახი კალაძეს და მე მას ვიწვევ პირდაპირ ღია საჯარო დებატებში.

ნებისმიერ დროს, ნებისმიერ არხზე, ნებისმიერ ფორმატში მე ვარ მზად დავდგე, ან დავჯდე მასთან დებატებში, ვინაიდან მიმაჩნია, რომ თბილისის მოსახლეობა, მოქალაქეები იმსახურებენ იმას, რომ კანდიდატები მუშტი-კრივზე კი არ ესაუბრებოდნენ, არამედ ესაუბრებოდნენ იმის შესახებ, თუ რას ვუპირებთ ჩვენ ამ ქალაქს. როგორ უნდა ვუშველოთ ამ ჯოჯოხეთურ საცობებს, რომლებშიც ყველა დავიტანჯეთ, რა უნდა ვუქნათ ამ მოშხამულ ჰაერს, შემცირებულ ამწვანებას, მონჯღრეულ საზოგადოებრივ ტრანსპორტს. რა უნდა ვუყოთ იმას, რომ ეს ქალაქი სინამდვილეში არიყოს გადასარჩენი.

მე მზად ვარ, დებატების დროს, დავასაბუთო, როგორ გადავარჩენთ მე და ჩემი გუნდი ამ ქალაქს საშინელი პრობლემებისგან. ველოდები, კახა კალაძისგან პასუხს“,-განაცხადა ელისაშვილმა.

მონიკა დავლიანიძე