პოლიტიკა

ალეკო ელისაშვილის შტაბის უფროსმა სამგორის პოლიციის გადაწყვეტილება გაასაჩივრა

ალეკო ელისაშვილის შტაბის უფროსმა ვანო ნორაკიძემ თბილისის პოლიციის მთავარ სამმართველოში სამგორის პოლიციის გადაწყვეტილების წინააღმდეგ საჩივარი შეიტანა, რომელიც ეხება ალეკო ელისაშვილზე გამოქვეყებული ვიდეოკადრების გამოძიებაზე უარის თქმას.

რამდენიმე კვირის წინ გავრცელდა ვიდეომასალა, რომელშიც ასახულია, როგორ აგროვებენ „ნაციონალური მოძრაობის“ მაისურებში ჩაცმული პირები ხელმოწერებს ელისაშვილის სასარგებლოდ.

ნორაკიძის თქმით, გამოძიების მოთხოვნით მან უწყებათაშორისო კომისიას მიმართა, თუმცა იქ ელისაშვილის საქმით არ დაინტერესდნენ.

„ვასაჩივრებ პროკურორის უსამართლო გადაწყვეტილებას, რომელიც გულისხმობს ალეკო ელისაშვილის წინააღმდეგ გავრცელებული ვიდეოკადრების გამოძიებაზე უარის თქმას.

ჩვენ ეს საკითხი ასევე დავაყენეთ უწყებათაშორისო კომისიის სხდომაზე, რომელსაც თავმდჯომარეობს თეა წულუკიანი, თუმცა, სამწუხაროდ, სახელმწიფო ხელისუფლების უმაღლესი თანამდებობის პირებისგანაც გამოიკვეთა, რომ ისინი არ არიან დაინტერესებული ამის გამოძიებით“, -თქვა ნორაკიძემ.

შეგახსენებთ, თბილისის მერობის არჩევნებზე დასარეგისტრირებლად ცენტრალურმა საარჩევნო კომისიამ ელისაშვილისგან, როგორც დამოუკიდებელი კანდიდატისგან, მოითხოვა 10 000 ხელმოწერის წარდგენა 1-ელი სექტემბრისთვის. „ნაციონალური მოძრაობის“ მერობის კანდიდატმა, ზაალ უდუმაშვილმა ხელმოწერების შეგროვებაში დახმარება შესთავაზა, რაზეც ელისაშვილისგან უარი მიიღო.

1-ელ სექტემბერს ალეკო ელისაშვილმა ცესკოს 19 576 ხელმოწერა წარუდგინა.

ანა მებურიშვილი