სამართალი

აყვანისას მივხვდი, რომ იქ ვიწირებოდი - გიორგი გიორგანაშვილი ნარკოპოლიტიკის შეცვლას ითხოვს

მსახიობი გიორგი გიორგანაშვილი (ბახალა) ქვეყანაში არსებული ნარკოპოლიტიკის შეცვლას ითხოვს.

ამის შესახებ გიორგანაშვილმა მოძრაოაბ „თეთრი ხმაურის“ ოფისში ისაუბრა.

გიორგანაშვილის თქმით, ის არალიბერალური კანონმდებლობის მსხვერპლი გახდა. როგორც მან აღნიშნა, სასჯელაღსრულების დაწესებულებაში ყოფნისას მსგავს მდგომარეობაში მყოფი უამრავი ადამიანი გაიცნო.

„ბევრი ადამიანი შემხვდა ციხეში, ვინც ანალოგიური პრობლემით იყო, უბრალოდ, მათ არ აქვთ სათანადო მხარდაჭერა და ძალიან ბევრმა მთხოვა, რაღაც ფორმით, მათი პრობლემა გამევრცელებინა“,- განაცხადა გიორგანაშვილმა.

მსახიობმა აღნიშნა, რომ დაკავებისას მისი უფლებები დაირღვა.

„ზეწოლა პროკურატურის მხრიდან სულ არის. დაკავების პროცესში ჩემი უფლებები დაირღვა.არც ოქმია ადგილზე შედგენილი, მოწმეებიც მარტო პოლიციელები არიან. რეალურად, იქ იყო თუნდაც ტაქსისტი. შეეძლოთ ნებისმიერი გამვლელი მანქანა გაეჩერებინათ და მოწმის სახით დაესწროთ. ადვოკატი შეიძლებოდა მოსულიყო, მაგრამ არაფერი არ დამიკმაყოფილეს.

რეალურად, ყველაზე მძიმე პირველი დღე იყო. აყვანისას მივხვდი, რომ იქ ვიწირებოდი“,- განაცხადა გიორგი გიორგანაშვილმა.

მოძრაობა „თეთრი ხმაურის“ წევრმა ბექა წიქარიშვილმა კი ხელისუფლებას მოუწოდა, ნარკოდანაშაულთან დაკავშირებული პრაქტიკა, ერთხელ და სამუდამოდ აღმოიფხვრას.

„მივმართავ, ჩვენი ხელისუფლების წარმომადგენლებს, მეგობრებო, გამოდის, რომ ჩვენ თქვენს საქმეს ვაკეთებთ. მოგიწოდებთ, გიბრძანებთ კიდეც, რომ უფრო აქტიურად ჩაერთოთ და ერთხელ და სამუდამოდ ეს პრაქტიკები ამ ქვეყნიდან აღმოვფხვრათ“,-აღნიშნა წიქარიშვილმა.

მონიკა დავლიანიძ