სამართალი

ახლობლები ორთაჭალაში მოკლული ახალგაზრდას გარდაცვალებას პოლიციის დაუდევრობას უკავშირებენ

ორთაჭალაში მომხდარ მკვლელობასთან დაკავშირებით ახალი დეტალები ირკვევა. მოკლული 24 წლის ბიჭის ახლობლებს კითხვები აქვთ სამართალდამცველებთან.

მათი ინფორმაციით, დაჭრილი ახალგაზრდა ერთი საათის განმავლობაში პოლიციის მანქანაში ჰყავდათ და გამოკითხვას აწარმოებდნენ, დაგვიანებული სამედიცინო დახმარების გამო კი, ფატალური შედეგი დადგა.

ოჯახის ახლობელის ინფორმაციით, გამოკითხვის დროს დაჭრილი მამაკაცი შეუძლოდ გახდა და პოლიციამ დაიწყო მისი საავადმყოფოში გადაყვანა, თუმცა გზაში სამართალდაცვლებეს ბენზინი გაუთავდათ და იძულებულები გახდნენ ახალგაზრდას გადასაყვანად ახალი ეკიპაჟი გამოეძახებინათ.

საპატრულო პოლიციის სხვა მანქანაში გადაყვანის შემდეგ კი, მამაკაცი საავადმყოფიში მიმავალ გზაზე გარდაიცვალა.

,,ჭრილობა ვნახეთ ბავშვის ფეხზე, მაგრამ ისე გამოიყურებიდა, თითქოს დაკაწრული იყო. ვუთხარით, საავადმყოფოში წაგიყვანთო და არა, ძალიან კარგად ვგრძნობ თავსო. ამ 2 საათის მანძილზე, სანამ პატრული მოვიდოდა, ბავშვი იყო ეზოში, შემდეგ პატრულს მანქანაში ჰყავდა დაკითხვაზე და გამხდარა ცუდად. ჩააქროლეს დაბლა, გაუთავდათ ბენზინი, მერე გადაიყვანეს სხვა საპატრულო მანქანაში და საავადმყოფოში უკვე მიასვენეს’’, - ამბობს ოჯახის ახლობელი ტელეკომპანია ,,იბერიასთან’’ საუბარში.

ახლობლების ბრალდებასთან დაკავშირებით კომენტარი გააკეთა შს მინისტრის მოადგილემ, შალვა ხუციშვილმა.

,,საწვავი რომ გამოელია, ეგ რაღაც ლეგენდების სფეროდან არის. ამასთან დაკავშირებით ჩვენი პრესსამსახური გააკეთებს განცხადებას და ყველაფერი იქნება ცნობილი, თუ რა მოხდა, როდის მივიდა საპატრულო და როდის წაიყვანა’’, - განაცხადა შალვა ხუციშვილმა.

სროლა გუშინ ღამით მოხდა. მამაკაცმა, რომელიც ახლობლების ინფორმაციით ფსიქიკურად გაუწონასწორებელი იყო, სასიკვდილოდ საკუთარი შვილი დაჭრა.

შსს-ს ინფორმაციით, დანაშაულში ბრალდებული ცხელ კვალზე დააკავეს. მკვლელობის მოტივად შელაპარაკება სახელდება.

ფაქტზე გამოძიება „სისხლის სამართლის კოდექსის“ 11-108-ე (ოჯახში ძალადობის ნიადაგზე განზრახ მკვლელობა) და 236-ე მუხლით (ცეცხლსასროლი იარაღის მართლსაწინააღმდეგო შეძენა-შენახვა) მიმდინარეობს.

ნინო ექვთიმიშვილი