პოლიტიკა

ახლა თქვენ ნუ მასწავლით ადამიანის უფლებებს, თორემ დაიქცა ეს ქვეყანა მართლა - ეკა ბესელია სოფო კილაძეს (ვიდეო)

„ახლა გავიგე, რატომ გავიდა სალომე სამადაშვილი იურიდიული კომიტეტიდან, რადგან კომიტეტის თავმჯდომარე არ აძლევს საუბრის უფლებას რიგის მიხედვით“,– ამის შესახებ საპარლამენტო უმრავლესობის წევრმა, სოფო კილაძემ იურიდიულ საკითხთა კომიტეტის სხდომაზე განაცხადა.

ამაზე უკვე გადამდგარმა იურიდიულ საკითხთა კომიტეტის თავმჯდომარემ უპასუხა, რომ უხარია, თუ კილაძესა და სამადაშვილს საერთო პოზიცია აქვთ.

„ჩვენ მოგვწონს თუ არ მოგვწონს ადამიანის მოსაზრება, ადამიანის უფლებების კომიტეტში ასე არის, რომ თითოეულ ადამიანს ეძლევა აზრის გამოთქმის საშუალებამ“, - განაცხადა სოფო კილაძემ, რაზეც ბესელიამ უპასუხა, რომ „ახლა თქვენ ნუ მასწავლით ადამიანის უფლებებს, თორემ დაიქცა ეს ქვეყანა მართლა“.

გარდა ამისა, კილაძე ასევე შეეხო ეკა ბესელიას თანამდებობიდან წასვლის საკითხს და განაცხადა, რომ ჯერ კიდევ ორი-სამი თვის წინ ამის შესახებ საუბრობდნენ ჟურნალისტები. დეპუტატის თქმით, მისთვის გაუგებარია, რატომ უკავშირებს ეკა ბესელია თავის გადადგომას უზენაესი სასამართლოს მოსამართლეების საკითხს.

„შეგიძლიათ, დასერჩოთ „გუგლში“ და პირდაპირ ამოაგდებს ჟურნალისტების სტატიებს, სადაც ამაზე იყო საუბარი. რატომ ხდება ამ საკითხის დაკავშირება მოსამართლეების თემასთან, ეს ყოვლად გაუგებარია. გაუგებარი კი არა გასაგები თემაა. ძალიან ნათელია ამ კონკრეტული თემების უკან რაც დგას”, – აღნიშნა კილაძემ.

ამაზე ბესელიამ უპასუხა, რომ უმჯობესია, ცოტა წინდახედულება და პასუხისმგებლობა გამოიჩინოს ყველამ, როცა შეფასებებს აკეთებენ.

„ახლა შევედით ისეთ საინტერესო ფაზაში, მე მეორე ეტაპს ნაადრევად დავიწყებ ალბათ. რაღაცების მოყოლას დავიწყებ ახლა. რაც ადრე ცხადდებოდა და რაც ადრე გაჟღერდა, ხომ არ არის ეს დაკავშირებული აი, ამ პროცესთან, ამაზე ცოტა მოგვიანებით ვილაპარაკებ. ეს, როგორც ჩანს, ადრე იგეგმებოდა, რატომ იგეგმებოდა ეს ადრე, იქამდეც მივალთ და მერე ვიღაც არ აღმოჩნდეს კიდევ უხერხულ მდგომარეობაში. ყველას ვურჩევ, ვინც დაკავებულია და დაკავებულია იმ პოზიციით, რომ ვერ გაუგია, სად არის და რატომ არის, ცოტა გაიაზროს პასუხისმგებლობა და ისე ილაპარაკოს, რადგან იმ ზონაში შევა, სადაც თავად დაიკარგება და ვეღარ გამოაგნებს გზას. ამიტომ უმჯობესია, ცოტა წინდახედულება და პასუხისმგებლობა გამოიჩინოს ყველამ, როცა ასეთ შეფასებებს გააკეთებს”, – განაცხადა ბესელიამ.

მანამდე ბესელიასა და კილაძეს შორის დაძაბულობას ჰქონდა ადგილი.

კილაძემ კომიტეტის სხდომაზე სიტყვით გამოსვლა მოითხოვა.

„უკვე დიდი ხანია, ხელი ავწიე”, – მიმართა კომიტეტის თავმჯდომარემ სოფო კილაძემ.

ამის საპასუხოდ ბესელიამ თანაგუნდელს დამშვიდებისკენ მოუწოდა.

„ყველა დამელოდეთ მშვიდად, რიგს აქ მე განვსაზღვრავ. დამშვიდდი, დაწყნარდი, რიგი განსაზღვრე იქ, სადაც შეგიძლია განსაზღვრო. აქ მე განვსაზღვრავ რიგს და მოვითმინოთ. დაწყნარდი, კიდევ ერთხელ გეუბნები, შეგიძლია გაიარ-გამოიარო და შემოხვიდე”, – მიმართა ეკა ბესელიამ სოფო კილაძეს.

ეკა ბესელია პარლამენტის იურიდიულ კომიტეტის კომიტეტის თავმჯდომარის რანგში ბოლოჯერ გაუძღვა. ეკა ბესელიამ კომიტეტის თავმჯდომარის თანამდებობა დღეს დატოვა.