პოლიტიკა

ახალი ვანო ჩხარტიშვილი 20-25 წლის შემდეგ ამ დაგროვებული პენსიის გარეშე დატოვებს საქართველოს მოსახლეობას - ალეკო ელისაშვილი

როგორც წლების წინ ვანო ჩხარტიშვილმა ჩვენი ბებიები და ბაბუები დატოვა ანაბრების გარეშე, ზუსტად ასე „ ქართულ ოცნებაში" ახლა გამოჩნდება ახალი ვანო ჩხარტიშვილი, რომელიც 20-25 წლის შემდეგ ამ დაგროვებული პენსიის გარეშე დატოვებს საქართველოს მოსახლეობას, - განაცხადა დღევანდელ ბრიფინგზე სამოქალაქო მოძრაობის დამფუძნებელმა ალეკო ელისაშვილმა, რომელიც საპენსიო რეფორმას მძარცველურ და თაღლითურ სქემად აფასებს.

„არანაირი კავშირი ამას საპენსიო რეფორმასთან არა აქვს. ეს არის ჩვეულებრივი მძარცველური სქემა, რომლის მიზანია ამ გაღატაკებული ქვეყნიდან და ამ ქვეყნის ღატაკი მოსახლეობის ჯიბეებიდან ამოიღონ დამატებით ფული. ჩვენ დეტალურად ვსწავლობდით ამ სქემას მის ამოქმედებამდე, და, სამწუხაროდ, ვართ ღრმად დარწმუნებულები, რომ ეს სქემა იმდენად ბუნდოვანი და საეჭვოა, რომ როგორც წლების წინ ვანო ჩხარტიშვილმა ჩვენი ბებიები და ბაბუები დატოვა ანაბრების გარეშე, ზუსტად ასე "ქართულ ოცნებაში" ახლა გამოჩნდება ახალი ვანო ჩხარტიშვილი, რომელიც 20-25 წლის შემდეგ ამ დაგროვებული პენსიის გარეშე დატოვებს საქართველოს მოსახლეობას. ამას სხვას ვერაფერს დავარქმევთ, ყაჩაღობის და ძარცვის სისტემის გარდა. თუკი ოდნავ ადეკვატურობა მაინც შერჩენია ხელისუფლებას, საუკეთესო გამოსავალი იქნებოდა ამ პროცესის შეჩერება, ადეკვატური მსჯელობის გამართვა და შემდეგ მოსახლეობისთვის ნორმალური სისტემის შეთავაზება", - განაცხადა ელისაშვილმა.