პოლიტიკა

ახალი სავიზო ცენტრი, იმედია, ხელს შეუწყობს მოქალაქეთა სავიზო, საკონსულო მომსახურების ხარისხის გაუმჯობესებას - ზურაბ აბაშიძე

რუსეთთან ურთიერთობის საკითხებში საქართველოს პრემიერ-მინისტრის სპეციალურმა წარმომადგენელმა ზურაბ აბაშიძემ იმედი გამოთქვა, რომ რუსეთის სავიზო ცენტრის გახსნა სავიზო და საკონსულო მომსახურების ხარისხს გააუმჯობესებს.

„ყველა დეტალი არ ვიცი ამასთან დაკავშირებით. ზოგადად შემიძლია გითხრათ, რომ სირთულეები იყო აშკარად. მხედველობაში მაქვს შვეიცარიის საელჩოსთან არსებული რუსეთის ინტერესთა სექცია, სადაც ჩვენი და სხვა ქვეყნების მოქალაქეები საკონსულო მომსახურებით სარგებლობდნენ. ეს ახალი სავიზო ცენტრი, იმედია, ხელს შეუწყობს ამ პრობლემების მოგვარებას და მოქალაქეთა სავიზო, საკონსულო მომსახურების ხარისხის გაუმჯობესებას“, – უთხრა აბაშიძემ პირველ არხს.

ხვალ თბილისში რუსული ვიზების ცენტრი გაიხსნება, რომელიც ბესიკის ქუჩა N4-ში, „ბიზნეს ცენტრი ბესიკზე“ შენობაში განთავსდება. მისი მიზანი საქართველოს მოქალაქეებისთვის დოკუმენტების გაფორმების პროცედურის დაჩქარებაა.

ცენტრი მოქალაქეებისგან ვიზის გასაფორმებლად საჭირო დოკუმენტებს მიიღებს, შეაგროვებს და სექციაში ჩააბარებს, სადაც უკვე მიიღებენ ვიზის გაცემის გადაწყვეტილებას. ცენტრის გახსნით საქართველოს მოქალაქეები ვიზის მიღებას შუამავლების გარეშე შეძლებენ.