პოლიტიკა

„ახალი საქართველო“ სამინისტროებსა და მერიაში შიდა აუდიტის სამსახურების გაუქმებას ითხოვს

„ახალი საქართველოს“ ანტიკორუფციული ბიუროს წარმომადგენლები, სამინისტროებსა და მერიაში შიდა აუდიტის სამსახურების გაუქმებას ითხოვენ.

პარტიის ანტიკორუფციული ბიუროს ხელმძღვანელის, ლევან ხაბეიშვილის განცხადებით, აუდიტისთვის გამოყოფილი მილიონობით დაფინანსება უშედეგოა და სამსახურები არაეფექტიანად მუშაობენ.

„სამინისტროების შიდა აუდიტის სამსახურის და თბილისის მერიის შიდა აუდიტის სამსახურის მუშაობა ვერ უძლებს ვერანაირ კრიტიკას და ჩვენ ამ უსაქმურობაში ფაქტობრივად ვხარჯავთ მილიონობით ლარს, “,- განაცხადა ლევან ხაბეიშვილმა.

პარტიამ დღესვე წარმოადგინა 15 თვის განმავლობაში 9 სამინისტროსა და თბილისის მერიის დანახარჯები, რაც მათი ინფორმაციით, 2016 წლის იანვრიდან 2017 წლის აპრილის ჩათვლით, 4 279 778 ლარს შეადგენს, აქედან 1 506 588 ლარი პრემია-დანამატია.

,,ახალი საქართველოს’’ ინფორმაციით, შიდა აუდიტის სამსახურისთვის გაცემული პრემია-დანამატის თვალსაზრისით, დედაქალაქის მერია ლიდერობს. მომდევნო კი, მათივე ცნობით, განათლების სამინისტროა.

რამდენიმე დღის წინ, პარტიამ „ანტიკორუფციული ბიურო“ შექმნა, რომლის მთავარი მიზანიც ხელისუფლებაში კორუფციული ფაქტების გამოვლენა და რეკომენდაციების გაცემა არის.

ნინო ექვთიმიშვილი