პოლიტიკა

ახალი კონსტიტუცია გამორიცხავს მხოლოდ ერთი პარტიის საპარლამენტო უმრავლესობას - ირაკლი კობახიძე

საქართველოს პარლამენტის თავმჯდომარის, ირაკლი კობახიძის განცხადებით, ახალი კონსტიტუციით გადაუნაწილებელი მანდატების მიკუთვნება არჩევნებში მხოლოდ პირველ ადგილზე გასული პარტიისთვის არის ბონუსის სისტემა.

კობახიძის განმარტებით, „ბონუსის“ მოცულობა ბოლო ხუთი არჩევნების მიხედვით, საშუალოდ 5% იქნებოდა, ხოლო ბოლო ოთხი არჩევნების მიხედვით - 3.1%. პარლამენტის თავმჯდომარემ აღნიშნა, რომ ბოლო საპარლამენტო არჩევნებზე ბონუსი 8%-ს შეადგენდა.

კობახიძის თქმით, 5%-იანი საარჩევნო ბარიერის შენარჩუნება განპირობებულია იმით, რომ ეს აპრობირებული პრაქტიკაა ევროკავშირის ქვეყნებშიც. მისი თქმით, 5%-იანი ბარიერი პროპორციული სისტემის სტაბილურობის ერთ-ერთი ფაქტორი იქნება.

როგორც კობახიძემ ქუთაისში კონსტიტუციის საყოველთაო-სახალხო განხილვის გახსნით შეხვედრაზე განაცხადა, ახალი კონსტიტუციით განსაზღვრული საარჩევნო სისტემა გამორიცხავს მხოლოდ ერთი პარტიის მიერ საპარლამენტო უმრავლესობის მოპოვებას.

ანა მებურიშვილი