პოლიტიკა

ახალი გამოწვევების ფონზე დადგა აუცილებლობა, მაქსიმალურად გავაძლიეროთ მმართველი პარტია - პრემიერი

საქართველოს პრემიერ-მინისტრის, გიორგი კვირიკაშვილის განცხადებით, მმართველი გუნდის გაძლიერების ეტაპი დადგა. მან აღნიშნა, რომ მნიშვნელოვანია, მმართველმა ძალამ შეინარჩუნოს ერთიანობა ფუნდამენტურ სახელმწიფოებრივ საკითხებთან დაკავშირებით.

„მინდა, გაგაცნოთ ის მნიშვნელოვანი სიახლე, რომელიც იგეგმება „ქართულ ოცნებაში“. სრულიად ბუნებრივია ინტერესი მმართველ გუნდში მიმდინარე პროცესების მიმართ და ხალხს სჭირდება სიცხადე. ჩვენ, როგორც ხელისუფლებაში მყოფი მმართველი ძალა, ვგრძნობთ განსაკუთრებულ პასუხისმგებლობას ქვეყნისა და ხალხის წინაშე და მივიჩნევთ, რომ სახელმწიფოს განვითარებისა და ახალი გამოწვევების ფონზე დადგა აუცილებლობა, მაქსიმალურად გავაძლიეროთ პარტია „ქართული ოცნება-დემოკრატიული საქართველო“ და სიმტკიცე შევძინოთ ჩვენს გუნდს. ჩვენთვის ძალიან მნიშვნელოვანია პარტიის შიგნით მიმდინარე დემოკრატიული პროცესები, ამავე დროს ჩვენ გვაერთიანებს მკვეთრად გამოხატული ღირებულებები, ერთიანი ხედვები როგორც საშინაო, ისე საგარეო მიმართულებით. ამიტომ მნიშვნელოვანია ჩვენ, როგორც მმართველმა პოლიტიკურმა ძალამ შევინარჩუნოთ ერთიანობა ფუნდამენტურ სახელმწიფოებრივ საკითხებთან დაკავშირებით“, - განაცხადა პრემიერმა დრევანდელ ბრიფინგზე.