სამართალი

ახალი გამგებლის/მერის არჩევისას უწყების ყველა სამსახურის ხელმძღვანელისთვის უფლებამოსილების ავტომატურად შეწყვეტის შესახებ ნორმა არაკონსტიტუციურად ცნეს

საკონსტიტუციო სასამართლომ არაკონსტიტუციურად ცნო „ადგილობრივი თვითმმართველობის კოდექსის“ ის ნორმები, რაც ახალი გამგებლის/მერის არჩევისას ავტომატურად უფლებამოსილებას უწყვეტდა გამგეობის/მერიის ყველა სამსახურის ხელმძღვანელს. -

ინფორმაციას ამის შესახებ ახალგაზრდა იურისტთა ასოციაცია ავრცელებს.

ორგანიზაციის ცნობით, საკონსტიტუციო სასამართლომ დააკმაყოფილა საიას მიერ მოქალაქე ოლეგ ლაცაბიძის სახელით წარდგენილი კონსტიტუციური სარჩელი.

,,საკონსტიტუციო სასამართლომ მიიჩნია, რომ აღნიშნილი ნორმა ეწინააღმდეგება საქართველოს კონსტიტუციის 29-ე მუხლის მე-2 პუნქტს (სახელმწიფო სამსახურის პირობები განისაზღვრება კანონით).

კანონი არ ითვალისწინებდა იმის შესაძლებლობას, რომ ინდივიდუალურად ყოფილიყო შეფასებული სამსახურის უფროსების პროფესიული უნარები და ამ შეფასების შესაბამისად ყოფილიყო მიღებული საკადრო გადაწყვეტილებები. მხოლოდ იმის გამო, რომ ახალი მერი/გამგებელი იქნა არჩეული, მთელს საქართველოში კონკურსით შერჩეული გამგეობის/მერიის სამსახურის ყველა უფროსი კარგავდა თანამდებობას. ეს გადაწყვეტილება არ ეხება თბილისის მერიის საქალაქო სამსახურის ხელმძღვანელებს“, - ნათქვამია საიას მიერ გავრცელებულ ინფორმაციაში.

ორგანიზაციის ინფორმაციით, სარჩელი შეტანილი იყო ხაშურის გამგეობის კულტურისა და განათლების სამსახურის უფროსის, ოლეგ ლაცაბიძის სახელით, რომელსაც 2014 წლის ადგილობრივი თვითმმართველობის არჩევნების შემდეგ უფლებამოსილება შეუწყდა.